ఈ ఏడాది సాధారణం కన్నా ఎక్కువ వానలు

 భారత వాతావరణ శాఖ వెల్లడి

దిల్లీ: ఈ ఏడాది నైరుతి రుతుపవనాల సీజన్‌(జూన్‌-సెప్టెంబరు)లో సాధారణం కంటే ఎక్కువ వర్షపాతం నమోదయ్యే అవకాశం ఉందని భారత వాతావరణ శాఖ(ఐఎండీ) సోమవారం తెలిపింది. ఆగస్టు-సెప్టెంబరు మధ్యలో లా నినా ప్రభావంతో ఎక్కువ మోతాదులో వర్షాలు కురుస్తాయని వెల్లడించింది. దేశంలో దీర్ఘకాలిక సగటు వర్షపాతం(1970-2020) 87 సెంటీ మీటర్లు కాగా, ఈ ఏడాది 106 శాతం అధికంగా(సుమారు 92 సెం.మీ.) వర్షపాతం నమోదయ్యే అవకాశముందని పేర్కొంది. దశాబ్దకాలంలో ఐఎండీ వార్షిక తొలిదశ అంచనాల్లోనే సాధారణం కన్నా అధిక వర్షపాతాన్ని ప్రకటించడం ఇదే తొలిసారి కావడం గమనార్హం. ప్రస్తుతం ఎల్‌నినో పరిస్థితులు బలహీనపడుతున్నాయని, నైరుతి ప్రారంభం నాటికి వాటి ప్రభావం మరింత తగ్గుముఖం పడుతుందని ఐఎండీ తెలిపింది. సాధారణ వర్షపాతానికి 29 శాతం, సాధారణం కంటే ఎక్కువ వర్షపాతానికి 31 శాతం, అధిక వర్షపాతానికి 30 శాతం అవకాశమున్నట్లు పేర్కొంది.