న్యాయప్రక్రియకు ఆటంకం కలిగించే చర్యలు తీసుకోలేం

రాజకీయ నేతల కేసులపై ఈసీ వివరణ

దిల్లీ: న్యాయ ప్రక్రియలో, న్యాయస్థానాలకు సంబంధించిన అంశాల్లో జోక్యం చేసుకొనే చర్యలను తాము తీసుకోలేమని కేంద్ర ఎన్నికల సంఘం తెలిపింది. ఎన్నికల వేళ.. విపక్ష నేతలను కేంద్ర దర్యాప్తు సంస్థలు లక్ష్యంగా చేసుకుంటున్నాయని ప్రతిపక్షాలు ఆరోపిస్తున్న నేపథ్యంలో ఈసీ ఈ మేరకు వివరణ ఇచ్చింది. అన్ని పార్టీలకు, అభ్యర్థులకు సమాన అవకాశాల కల్పించేందుకు తాము కట్టుబడి ఉన్నామని పేర్కొంది. రాజకీయ నేతల కేసుల విషయంలో న్యాయప్రక్రియకు ఆటంకం కలిగించే చర్యలను తాము తీసుకోలేమని తెలిపింది. ఎన్నికల ప్రవర్తనా నియమావళి ఉల్లంఘనపై దాదాపు 200 ఫిర్యాదులు (భాజపా 51, కాంగ్రెస్‌ 59, ఇతర పార్టీలు 90) అందాయని, 169 కేసుల్లో చర్యలు తీసుకున్నామని పేర్కొంది.