కోర్టు వెలుపలి నేర అంగీకారాలు బలహీన సాక్ష్యాధారాలే

హత్య కేసు నిందితుడిని నిర్దోషిగా ప్రకటించిన సుప్రీంకోర్టు

దిల్లీ: న్యాయస్థానం వెలుపల నిందితులు చేసే నేర అంగీకారాలు స్వభావ రీత్యా బలహీనమైన సాక్ష్యాలే అవుతాయని సుప్రీంకోర్టు తెలిపింది. బలమైన సాక్ష్యాలను సమర్థించేవిగా మాత్రమే అవి ఉంటాయని పేర్కొంది. 1998లో జరిగిన హత్య కేసులో నిందితుడిగా ఉన్న వ్యక్తిని నిర్దోషిగా ప్రకటించింది. పంజాబ్‌, హరియాణా హైకోర్టు 1999లో విధించిన జీవిత ఖైదును సవాల్‌ చేస్తూ నిందితుడు సుప్రీంకోర్టును ఆశ్రయించారు. ఈ కేసులో జస్టిస్‌ బి.ఆర్‌.గవాయి, జస్టిస్‌ సందీప్‌ మెహతా మంగళవారం తీర్పు వెలువరించారు. సినిమా థియేటర్‌లో హత్య జరిగిందనేది ప్రాసిక్యూషన్‌ అభియోగం. దీనికి ఆధారం మృతుడి సోదరుడు, మరో వ్యక్తి ఇచ్చిన సాక్ష్యం. నిందితుడు తానే హత్య చేసినట్లుగా తనతో చెప్పారని రెండో సాక్షిగా ఉన్న వ్యక్తి వెల్లడించారు. హత్య జరిగిన సమయంలో బాధితుడి సోదరుడు అక్కడే ఉన్నట్లు చెప్పిన ప్రాసిక్యూషన్‌ వాదన సహేతుకంగా లేదని ధర్మాసనం గుర్తించింది. బలమైన సాక్ష్యాలు లేకపోవడం, సమర్పించిన ఆధారాలు సందేహాస్పదం కావడంతో నిందితుడిని నిర్దోషిగా ప్రకటిస్తున్నట్లు ధర్మాసనం స్పష్టం చేసింది.