ముంబయి మహిళకు పాక్‌లో చిత్రహింసలు

 లాహోర్‌లో కేసు నమోదు.. పరారీలో భర్త 

లాహోర్‌: పాకిస్థాన్‌లోని పంజాబ్‌ ప్రావిన్సులో భారతీయురాలైన భార్యను చిత్రహింసలు పెడుతున్న భర్తపై కేసు నమోదు చేసినట్లు లాహోర్‌ పోలీసులు బుధవారం వెల్లడించారు. తన పాస్‌పోర్టు స్వాధీనం చేసుకొని, అక్రమంగా నిర్బంధించి హింసిస్తున్నట్లు ఫర్జానా బేగం అనే మహిళ ఇచ్చిన ఫిర్యాదు మేరకు ఆమె భర్త మీర్జా యూసుఫ్‌ ఇలాహీపై కేసు నమోదు చేశామని పోలీసు అధికారి మహమ్మద్‌ అబ్బాస్‌ తెలిపారు. నిందితుడి అరెస్టు కోసం గాలిస్తున్నట్లు వెల్లడించారు. ముంబయికి చెందిన ఫర్జానా అబుధాబీలోని దుకాణంలో పనిచేసేది. 2015లో మీర్జాతో వివాహమైంది. 2018లో వీరి కాపురం లాహోర్‌కు మారింది. ఫర్జానాను భర్త చిత్రహింసలు పెడుతూ భారత్‌కు తిరిగి వెళ్లిపోవాలని ఒత్తిడి తెచ్చేవాడు. ఓసారి ఇద్దరు పోలీసుల సాయంతో వాఘా సరిహద్దు వరకు తరలించినా, అక్కడున్న అధికారులకు తన గోడు చెప్పుకొని మళ్లీ వెనక్కు వెళ్లింది.