దేశ జనాభా 144 కోట్లు

యూఎన్‌ఎఫ్‌పీఏ నివేదికలో అంచనా

దిల్లీ: దేశ జనాభా ఈ ఏడాదికి సుమారుగా 144 కోట్లు ఉంటుందని యునైటెడ్‌ నేషన్స్‌ పాపులేషన్‌ ఫండ్‌ (యూఎన్‌ఎఫ్‌పీఏ) స్టేట్‌ ఆఫ్‌ వరల్డ్‌ పాపులేషన్‌-2024 నివేదికలో అంచనా వేసింది. అందులో 24శాతం మంది 0-14 ఏళ్ల వయస్సు వారేనని పేర్కొంది. 10 నుంచి 19 ఏళ్ల వయసు ఉన్నవారు 17శాతం మంది, 10-24 ఏళ్ల వయసు ఉన్నవారు 26 శాతం, 15-64 ఏళ్ల వయసు ఉన్న వారు 68శాతం, 65 ఏళ్లు ఆపై ఉన్నవారు 7శాతం ఉండొచ్చని నివేదికలో తెలిపింది. పురుషుల జీవిత కాలం 71 ఏళ్లు కాగా.. స్త్రీల జీవిత కాలం 74ఏళ్లు ఉంటుందని తెలిపింది. 144.17 కోట్ల జనాభాతో భారత్‌ అగ్రస్థానంలో, 142.5 కోట్లతో చైనా రెండో స్థానంలో ఉంటాయని వెల్లడించింది. అలాగే 2006 నుంచి 2023 మధ్య బాల్య వివాహాల శాతం 23గా ఉండగా.. ప్రసూతి మరణాల రేటు గణనీయంగా తగ్గిందని నివేదికలో స్పష్టం చేసింది.