హిమాచల్‌లో గ్రామానికి తొలిసారి మొబైల్‌ సౌకర్యం

గీవు వాసులతో మాట్లాడిన ప్రధాని మోదీ

దిల్లీ: హిమాచల్‌ప్రదేశ్‌లోని స్పిటీ ప్రాంతంలో మారుమూల గ్రామమైన గీవుకు తొలిసారిగా మొబైల్‌ సౌకర్యం అందుబాటులోకి వచ్చింది. ఈ సందర్భాన్ని పురస్కరించుకుని ప్రధానమంత్రి నరేంద్ర మోదీ గురువారం గ్రామస్థులతో 13 నిమిషాలకుపైగా మొబైల్‌లో ముచ్చటించారు. దీపావళి పండగ సందర్భంగా తాను సరిహద్దు ప్రాంతానికి వెళ్లడం తదితర విషయాలను వారితో పంచుకున్నారు. గీవు గ్రామాన్ని మొబైల్‌ నెట్‌వర్క్‌తో అనుసంధానించడం ‘డిజిటల్‌ ఇండియా ప్రచారాన్ని’ వేగవంతం చేస్తుందని ఆశాభావం వ్యక్తం చేశారు. విద్యుదీకరణ కార్యక్రమం విజయవంతం కావడంతో ఇప్పుడు అన్ని ప్రాంతాలను కమ్యూనికేషన్‌ టెక్నాలజీతో అనుసంధానం చేయడానికి ప్రభుత్వం ప్రాధాన్యం ఇస్తోందని చెప్పారు. తాను అధికారంలోకి వచ్చే సమయానికి దేశంలో 18,000 గ్రామాలకు విద్యుత్తు సదుపాయం లేదని ప్రస్తావించారు. తమ గ్రామాన్ని మొబైల్‌ నెట్‌వర్క్‌తో అనుసంధానం చేస్తున్నట్లు చెప్పినప్పుడు ఏమాత్రం నమ్మలేదని, ఇప్పుడు అది వాస్తవ రూపం దాల్చడంతో తమ ఆనందానికి అవధుల్లేవని గ్రామస్థుడు ఒకరు మోదీతో అన్నారు.