గాడిద పాలతో నెలకు రూ.3 లక్షలు

గుజరాత్‌ యువకుడి విజయగాథ

అహ్మదాబాద్‌: గాడిద పాలను విక్రయించి గుజరాత్‌కు చెందిన ధీరేణ్‌ సోలంకీ నెలకు రూ.3 లక్షలు సంపాదిస్తున్నారు. చాలా కాలం పాటు ఆయన ప్రభుత్వ ఉద్యోగం కోసం ప్రయత్నించినా విజయం సాధించలేకపోయారు. దీంతో కొన్ని ప్రైవేట్‌ సంస్థల్లో పని చేశారు. ఆర్థికంగా పెద్దగా సంతృప్తి చెందలేదు. ఈ క్రమంలో కొత్త ఉపాధి మార్గాలు అన్వేషించారు. దక్షిణ భారత్‌లో గాడిదల పెంపకానికి క్రమంగా ఆదరణ పెరుగుతోందని తెలుసుకున్నారు. కొంత మందిని కలిసి సమాచారం సేకరించారు.

20 గాడిదలతో ప్రారంభం..

ఎనిమిది నెలల క్రితం 20 గాడిదలతో సొంత గ్రామంలోనే ధీరేణ్‌ సోలంకీ ఫామ్‌ను ప్రారంభించారు. రూ.22 లక్షలు పెట్టుబడిగా పెట్టారు. ఇప్పుడు అవి 42 గాడిదలయ్యాయి. వాటి నుంచి వచ్చే పాలను దక్షిణ భారత్‌లోని ఖాతాదారులకు సరఫరా చేస్తున్నారు. నెలకు రూ.2 లక్షల నుంచి రూ.3 లక్షలు సంపాదిస్తున్నట్లు ధీరేణ్‌ సోలంకీ తెలిపారు. ‘తొలినాళ్లలో కాస్త కష్టంగానే అనిపించింది. గుజరాత్‌లో గాడిద పాలకు పెద్దగా గిరాకీ లేదు. దీంతో తొలి ఐదు నెలలు ఆదాయమేమీ రాలేదు. క్రమంగా దక్షిణ భారత్‌లోని ఖాతాదారులను సంప్రదించా. అక్కడ డిమాండ్‌ బాగా ఉంది. ఇప్పుడు కర్ణాటక, కేరళకు ఈ పాలను సరఫరా చేస్తున్నాను. సౌందర్య ఉత్పత్తుల తయారీ కంపెనీలు వీటిని కొనుగోలు చేస్తున్నాయి’’ అని సోలంకీ వివరించారు. గాడిద పాలు ఒక లీటర్‌ ధర రూ.5,000 నుంచి రూ.7,000 వరకు ఉన్నట్లు వెల్లడించారు.