దేవాలయాల్లో గ్రంథాలయాలు ఏర్పాటు చేయాలి

ఇస్రో ఛైర్మన్‌ ఎస్‌.సోమనాథ్‌ సూచన

తిరువనంతపురం: యువతలో ఆధ్యాత్మిక భావం పెంపొందాలంటే దేవాలయాల్లో గ్రంథాలయాలను ఏర్పాటు చేయాలని భారత అంతరిక్ష పరిశోధన సంస్థ (ఇస్రో) ఛైర్మన్‌ ఎస్‌.సోమనాథ్‌ సూచించారు. తిరువనంతపురంలోని శ్రీ ఉడియన్నూర్‌ దేవి ఆలయం సభ్యులు శనివారం నిర్వహించిన సన్మాన కార్యక్రమంలో ఆయన మాట్లాడారు. ‘ఈ సత్కార సభకు యువత అధిక సంఖ్యలో హాజరవుతారని ఊహించాను. కానీ, ఇక్కడ పరిస్థితి అందుకు భిన్నంగా ఉంది. యువతరాన్ని ప్రార్థనా మందిరాల వైపు ఆకర్షితులయ్యేలా గ్రంథాలయాలను ఎందుకు ఏర్పాటు చేయకూడదు?’ అని తన ఆలోచనను పంచుకున్నారు. ఆలయాలు కేవలం పెద్దవారి కోసమే కాదని, యువత కూడా వచ్చేలా చేయడంతో వాటిని సమాజాన్ని మార్చే ప్రభావవంతమైన ప్రదేశాలుగా తీర్చిదిద్దాలని ఆకాంక్షించారు. ఈ సందర్భంగా ఇస్రో మాజీ ఛైర్మన్‌ జి.మాధవన్‌ నాయర్‌ ఆయనకు అవార్డు ప్రదానం చేశారు.