ప్రధాని మోదీ వ్యాఖ్యలపై ప్రైవేటు కేసు

బెంగళూరు(శివాజీనగర), న్యూస్‌టుడే: ముస్లింలు చొరబాటుదారులని.. కాంగ్రెస్‌ను గెలిపిస్తే దేశంలో వారు ఎక్కువైపోతారంటూ ప్రధాని నరేంద్రమోదీ ఎన్నికల ప్రచార సభలో అభ్యంతరకర వ్యాఖ్యలు చేశారని బెంగళూరులోని హెబ్బాళ నివాసి జియా ఉర్‌ రెహమాన్‌ నొమాని (32) ఇక్కడి సివిల్‌ కోర్టులో ప్రైవేటు కేసు వేశారు. రాజస్థాన్‌లో ఏప్రిల్‌ 21న నిర్వహించిన ఎన్నికల ప్రచార సభలో మోదీ చేసిన ప్రసంగం రెండు మతాల మధ్య ద్వేషాన్ని సృష్టించేదిగా ఉందని అమృతహళ్లి ఠాణాలో ఇంతకుముంద]ు ఆయన ఫిర్యాదు చేశారు. ఈ విషయం కేంద్ర ఎన్నికల కమిషన్‌ పరిధిలోకి వస్తుందని పోలీసులు సూచించారు. ఈసీకి, నగర పోలీసు కమిషనర్‌కు ఈమెయిళ్ల ద్వారా నొమాని ఫిర్యాదు చేసినా, స్పందన లేకపోవడంతో న్యాయస్థానంలో ప్రైవేటు కేసు దాఖలు చేశారు. ఇది సిటీ సివిల్‌ కోర్టులో మంగళవారం విచారణకు రానుంది.