మూడేళ్లలో 8 కిలోమీటర్ల మేర తగ్గిన వందేభారత్‌ రైళ్ల వేగం

దిల్లీ: వందే భారత్‌ రైళ్లు 2020-21లో సగటున 84.48 కిలోమీటర్ల వేగంతో ప్రయాణించగా.. ప్రస్తుతం గంటకు 76.25 కిలోమీటర్ల సగటు వేగంతో మాత్రమే నడుస్తున్నాయని రైల్వే మంత్రిత్వ శాఖ శుక్రవారం తెలిపింది. 2022-23లో ఈ వేగం 81.38గా ఉండేదని వెల్లడించింది. భౌగోళిక కారణాలు, తీవ్రమైన వాతావరణ పరిస్థితుల వల్ల కొన్ని ప్రాంతాల్లో ఈ రైళ్లు నియంత్రించిన వేగంలోనే ప్రయాణిస్తున్నాయని పేర్కొంది. వర్షకాలంలో అన్ని రైళ్లను 75 కిలోమీటర్ల గరిష్ఠ వేగంతో నడపడం సవాలుతో కూడుకున్న విషయమని వివరించింది. ఈ మేరకు సమాచార హక్కు చట్టం కింద దాఖలైన ఓ దరఖాస్తుకు రైల్వేమంత్రిత్వ శాఖ సమాధానమిచ్చింది. మధ్యప్రదేశ్‌కు చెందిన సామాజిక కార్యకర్త చంద్రశేఖర్‌ గౌర్‌ ఈ దరఖాస్తు దాఖలు చేశారు. వందేభారత్‌ రైళ్లు గంటకు గరిష్ఠంగా 160 కిలోమీటర్ల వేగంతో ప్రయాణించే సామర్థ్యం ఉన్నా..దాని వేగం ట్రాక్‌ సామర్థ్యం మీద ఆధారపడి ఉంటుందని రైల్వే అధికారి ఒకరు తెలిపారు. దిల్లీ-ఆగ్రా మధ్య ఉన్న కొన్ని ట్రాక్‌లపై గరిష్ఠంగా 160 కిలోమీటర్ల వేగంతో ప్రయాణిస్తాయని వెల్లడించారు. మరికొన్ని ట్రాక్‌లపై రైలు వేగం చాలా తక్కువగా ఉంటుందని పేర్కొన్నారు. దేహ్రాదూన్‌-ఆనంద్‌ విహార్‌ ట్రాక్‌పై 63.42, పట్నా-రాంచీ 62.9, కోయంబత్తూర్‌-బెంగళూర్‌ ట్రాక్‌పై 58.11 కిలోమీటర్ల వేగంతో ప్రయాణిస్తాయని వివరించారు.