ఛత్తీస్‌గఢ్‌ ఎన్‌కౌంటరులో.. నక్సల్స్‌ వద్ద అమెరికా తుపాకీ

రాయ్‌పుర్‌: ఛత్తీస్‌గఢ్‌ రాష్ట్రంలోని బీజాపుర్‌ వద్ద నవంబర్‌ 26న మావోయిస్టులతో జరిగిన ఎన్‌కౌంటరు అనంతరం స్వాధీనం చేసుకున్న నాలుగు ఆయుధాల్లో అమెరికాలో తయారైన ఎం1 కార్బైన్‌ తుపాకీ ఉన్నట్లు పోలీసులు ఆదివారం వెల్లడించారు. మిగతావాటితో పోల్చితే ఈ తుపాకీ బ్యారెల్‌ చిన్నగా ఉండి, పట్టుకునేందుకు అనువుగా ఉంటుంది. మిర్‌తుర్‌ పోలీస్‌స్టేషను పరిధిలోని పొమ్రా అడవుల్లో భద్రతా దళాలతో జరిగిన ఈ ఎదురుకాల్పుల్లో నలుగురు మావోయిస్టులు మృతిచెందిన విషయం తెలిసిందే. మావోయిస్టుల చేతికి అత్యాధునిక ఆయుధాలు ఎలా వస్తున్నాయనే కోణంలో పోలీసులు దర్యాప్తు ప్రారంభించారు. గతంలో జరిగిన ఎన్‌కౌంటర్లలోనూ అమెరికా, జర్మనీల్లో తయారైన ఆయుధాలు మావోయిస్టుల వద్ద పోలీసులకు చిక్కాయి.