Marriage: పెళ్లి పీటలపైనే గుర్రుపెట్టి నిద్రపోయిన వరుడు.. వధువు ఏం చేసిందంటే..!

నల్‌బరి: పెళ్లి వేడుక ఘనంగా జరుగుతోంది. వధూవరుల తరఫు బంధువులతో ఆ ప్రాంతమంతా సందడిగా ఉంది. పండితుడు వేదమంత్రాలతో పెళ్లి తంతు జరిపిస్తున్నాడు. కానీ, శాస్త్రోక్తంగా అతడు చెప్పే మాటలను పెళ్లి కొడుకు (Groom) వినే పరిస్థితిలో లేడు. పూటుగా మద్యం (Liquor) తాగి ఉన్నాడు. కారులోంచి దిగినప్పటి నుంచే వింతగా ప్రవర్తిస్తున్నాడు.పెళ్లిపీటలపైనే నిద్రపోయాడు. అతడి ప్రవర్తనతో చిర్రెత్తుకొచ్చిన వధువు పెళ్లిపీటల మీద నుంచి లేచి వెళ్లిపోయింది. ఈ ఘటన అస్సాం (Assam)లోని నల్‌బరి జిల్లాలో జరిగింది.

ప్రసేన్‌జీత్‌ హలోయ్‌ అనే యువకుడికి ఓ యువతితో  వివాహం నిశ్చయమైంది. పెద్దల సమక్షంలో భారీగా పెళ్లి ఏర్పాట్లు చేశారు. కానీ, మద్యం తాగి పెళ్లి మండపానికి వచ్చిన వరుడిని చూసి వధువు పెళ్లికి నిరాకరించింది. పెళ్లి కొడుకు తరఫు వచ్చిన వారిలో దాదాపు అందరిదీ ఇదే పరిస్థితి. అయితే, కుటుంబ సభ్యులు ఒప్పించడంతో ఆమె పెళ్లి పీటలపై కూర్చుంది. మద్యం మత్తులో తూగుతూనే పెళ్లి కొడుకు ఆమె పక్కన కూర్చున్నాడు. పురోహితుడు చెప్పే మాటలను కూడా వినే పరిస్థితిలో లేడు. పెళ్లిపీటలపైనే నిద్రపోయాడు. దీంతో వధువు కోపంతో అక్కడి నుంచి లేచి వెళ్లిపోయింది. పెళ్లి కొడుకు ప్రవర్తనపై వధువు తరఫు బంధువులు గ్రామపెద్దలను ఆశ్రయించారు. అంతేకాకుండా నల్‌బరి పోలీస్‌స్టేషన్‌లో ఫిర్యాదు చేశారు. పరిహారం చెల్లించాలంటూ వరుడి కుటుంబాన్ని డిమాండ్‌ చేశారు. కేసు నమోదు చేసుకున్న పోలీసులు దర్యాప్తు చేస్తున్నారు.