Arvind Kejriwal: కేజ్రీవాల్‌కు షాక్‌.. అరెస్టు నుంచి మినహాయింపుల్లేవన్న కోర్టు

దిల్లీ: మద్యం విధానానికి (Delhi Excise Scam Case) సంబంధించిన మనీలాండరింగ్‌ కేసులో దిల్లీ ముఖ్యమంత్రి అరవింద్‌ కేజ్రీవాల్‌ (Arvind Kejriwal)కు ఎదురుదెబ్బ తగిలింది. ఈ కేసులో ఆయనకు అరెస్టు నుంచి మినహాయింపు కల్పించేందుకు దిల్లీ హైకోర్టు నిరాకరించింది. ప్రస్తుతం కేసు పురోగతి దృష్ట్యా ఇందులో తాము జోక్యం చేసుకోలేమని తేల్చి చెప్పింది.

ఈ కేసులో కేజ్రీవాల్‌కు ఈడీ (ED) తొమ్మిది సార్లు సమన్లు జారీ చేసిన విషయం తెలిసిందే. చివరిసారి ఇచ్చిన నోటీసులకు గురువారం (మార్చి 21న) హాజరుకావాల్సి ఉండగా.. ఆయన వెళ్లలేదు. తనకు జారీ అయిన సమన్లను సవాల్‌ చేస్తూ దిల్లీ సీఎం ఇటీవల హైకోర్టును ఆశ్రయించారు. దీనిపై విచారణ జరిపిన న్యాయస్థానం.. విచారణకు ఎందుకు హాజరుకావడం లేదని అడిగింది. అరెస్టు చేస్తారని భావిస్తుంటే చట్టపరమైన రక్షణ ఎందుకు తీసుకోలేదని ప్రశ్నించింది. అనంతరం విచారణను వాయిదా వేసింది.

ఈడీ ఎదుట ఎందుకు హాజరుకావడం లేదు?: కేజ్రీవాల్‌ను ప్రశ్నించిన దిల్లీ హైకోర్టు

ఈ క్రమంలోనే కేజ్రీవాల్‌ నేడు మరో పిటిషన్‌ దాఖలు చేశారు. ఈడీ తనపై తీవ్ర చర్యలు తీసుకోకుండా నిలువరించాలని హైకోర్టును అభ్యర్థించారు. దీనిపై ఇరుపక్షాల వాదనలు విన్న ధర్మాసనం.. సీఎంకు అరెస్టు నుంచి మినహాయింపు ఇచ్చేందుకు నిరాకరించింది. కేజ్రీవాల్‌ అభ్యర్థనపై ఈడీని వివరణ కోరింది. అనంతరం విచారణను వాయిదా వేసింది. సమన్లను సవాల్‌ చేస్తూ దాఖలు చేసిన ప్రధాన పిటిషన్‌తో పాటే దీన్ని ఏప్రిల్‌ 22న విచారిస్తామని తెలిపింది.

మద్యం కుంభకోణం కేసులో ఇప్పటికే సీబీఐ కేజ్రీవాల్‌ను విచారించింది. గతేడాది ఏప్రిల్‌లో 9 గంటల పాటు ప్రశ్నించారు. తాజాగా ఈడీ నమోదు చేసిన కేసులోనూ వరుసగా సమన్లు అందుతున్నాయి. ఇక ఇదే కేసులో దిల్లీ మాజీ డిప్యూటీ సీఎం మనీశ్ సిసోదియా, ఆప్‌ ఎంపీ సంజయ్‌ సింగ్‌ అరెస్టయి జైల్లో ఉన్నారు.