IT Raids: జ్యువెలరీ దుకాణంలో ఐటీ సోదాలు.. ₹26 కోట్లు నగదు సీజ్‌!

నాసిక్‌: మహారాష్ట్రలోని నాసిక్‌లో ఓ జ్యువెలరీ సంస్థపై ఐటీ అధికారులు ఆదివారం దాడులు నిర్వహించారు. లెక్కల్లో చూపని రూ.26 కోట్ల నగదును సీజ్‌ చేసినట్లు అధికారిక వర్గాలు వెల్లడించాయి. ఆభరణాల కంపెనీ, దాని ప్రమోటర్లు పన్ను ఎగవేతకు పాల్పడినట్లు వచ్చిన ఆరోపణల నేపథ్యంలో సోదాలు చేసినట్లు పేర్కొన్నారు. ఈ దాడుల్లో దాదాపు రూ.26 కోట్ల నగదును ఇప్పటివరకు సీజ్‌ చేసినట్లు సమాచారం. దీంతో పాటు బహిర్గతం చేయని పెట్టుబడులకు సంబంధించిన కొన్ని పత్రాలను సైతం గుర్తించినట్లు తెలుస్తోంది. గత వారం ఆగ్రాలో కూడా ఇదే తరహా దాడులు జరిగాయి. ఓ షూ వ్యాపారి, కొన్ని అనుబంధ సంస్థలపై దాడులు జరిపిన ఐటీ అధికారులు.. రూ.57 కోట్ల నగదు స్వాధీనం చేసుకున్నారు.