PM Modi: జపాన్‌ చేరుకున్న ప్రధాని మోదీ.. పాక్‌తో సంబంధాలపై ఏమన్నారంటే!

దిల్లీ: పాకిస్థాన్‌ (Pakistan)తో సాధారణ, పొరుగు సంబంధాలను కోరుకుంటున్నామని ప్రధాని నరేంద్ర మోదీ (Narendra Modi) స్పష్టం చేశారు. అయితే.. ఉగ్రవాదం, వైషమ్యాలు లేని వాతావరణాన్ని సృష్టించి, ఈ మేరకు అవసరమైన చర్యలు తీసుకోవాల్సిన బాధ్యత ఇస్లామాబాద్‌పైనే ఉందని పేర్కొన్నారు. జీ7 సదస్సు (G7 Summit)లో పాల్గొనేందుకు ప్రధాని మోదీ జపాన్‌ (Japan)కు బయల్దేరిన వేళ ఓ వార్తాసంస్థ ఇంటర్వ్యూలో మాట్లాడారు. భారత్‌ తన సార్వభౌమాధికారాన్ని, ప్రతిష్ఠను కాపాడుకునే అంశానికి కట్టుబడి ఉందని, ఈ మేరకు పూర్తిగా సిద్ధంగా ఉందని తెలిపారు. ఈ సందర్భంగా చైనాతో సంబంధాలపైనా (India- China Relations) కీలక వ్యాఖ్యలు చేశారు.

‘చైనాతో సాధారణ సంబంధాలకుగానూ సరిహద్దు ప్రాంతాల్లో శాంతి స్థాపన చాలా అవసరం. ఆ దేశంతో తమ సంబంధాలు.. పరస్పర గౌరవం, ప్రయోజనాలపైనే ఆధారపడి ఉంటాయి. ఈ రెండు దేశాల మధ్య సానుకూల సంబంధాలు ఈ ప్రాంతానికి, ప్రపంచానికీ ప్రయోజనం చేకూరుస్తాయి’ అని ప్రధాని మోదీ అన్నారు. రష్యా- ఉక్రెయిన్ వివాదంలో భారత్‌ మధ్యవర్తి పాత్ర పోషించగలదా అనే ప్రశ్నకు బదులిస్తూ.. ఈ విషయంలో భారత్‌ మొదటినుంచి శాంతిస్థాపన వైపు నిలుస్తోందని గుర్తుచేశారు. రష్యా, ఉక్రెయిన్‌.. రెండింటితో సంప్రదింపులు కొనసాగిస్తామని చెప్పారు. ప్రాథమిక అవసరాలు తీర్చుకునేందుకు ఇక్కట్లు ఎదుర్కొంటున్నవారికి మద్దతు ఇస్తామన్నారు.

ఇదిలా ఉండగా.. జీ7 సదస్సులో పాల్గొనేందుకు జపాన్‌కు బయల్దేరిన ప్రధాని మోదీ శుక్రవారం అక్కడి హిరోషిమాకు చేరుకున్నారు. ఈ సందర్భంగా జపాన్‌ ప్రతినిధులు, భారత దౌత్యవేత్తలు ప్రధాని మోదీకి స్వాగతం పలికారు. విమానాశ్రయంలో ప్రవాస భారతీయులను కలుసుకున్నారు. ప్రజాస్వామ్యం, స్వేచ్ఛ, చట్టబద్ధమైన పాలన వంటి విలువలు.. జపాన్, భారత్‌లను మరింత దగ్గర చేశాయని అన్నారు. జీ7 సదస్సులో ‘గ్లోబల్‌ సౌత్‌’ గొంతుకను వినిపించడంతోపాటు ఇంధనం, డిజిటల్ టెక్నాలజీ, సరఫరా గొలుసుల వంటి రంగాల్లో మార్పులు, సవాళ్లను చర్చించడానికి ఎదురు చూస్తున్నట్లు తెలిపారు. 2003 నుంచి జీ7 సదస్సులో భారత్ పాల్గొంటోంది.