Lokayukta: కర్ణాటక లంచం కేసు.. భాజపా ఎమ్మెల్యేకు ముందస్తు బెయిల్‌

బెంగళూరు: కర్ణాటకలో (Karnataka) భాజపా ఎమ్మెల్యే కుమారుడు లంచం తీసుకుంటూ లోకాయుక్త (Lokayukta) చేతికి చిక్కిన విషయం తెలిసిందే. ఈ కేసులో ప్రధాన నిందితుడిగా ఉన్న ఎమ్మెల్యే మదాల్‌ విరూపాక్షప్పకు (Virupakshappa) కర్ణాటక హైకోర్టు ముందస్తు బెయిల్‌ మంజూరు చేసింది. లంచం కేసులో ప్రశాంత్‌తో సహా ఐదుగురిని లోకాయుక్త అరెస్టు చేసినప్పటి నుంచి ఆయన అజ్ఞాతంలోకి వెళ్లిపోయారు.

ఎమ్మెల్యే విరూపాక్షప్ప (Virupakshappa) తరఫునే ప్రశాంత్‌ లంచం తీసుకున్నారని లోకాయుక్త (Lokayukta) అనుమానిస్తోంది. దీంతో ఈ కేసులో ఆయన్ను ఏ1గా చేర్చింది. అదుపులోకి తీసుకునేందుకు ప్రయత్నించినప్పటికీ ఎమ్మెల్యే ఆచూకీ మాత్రం లభించలేదు. ఇదే సమయంలో ఈకేసులో తన పాత్ర లేదని పేర్కొంటూ  విరూపాక్షప్ప హైకోర్టులో ముందస్తు బెయిల్‌కు దరఖాస్తు చేసుకున్నారు. దీనిని మంగళవారం విచారించిన జస్టిస్‌ కే నటరాజన్‌ ఏకసభ్య ధర్మాసనం.. ఎమ్మెల్యేకు బెయిల్‌ మంజూరు చేసింది.

ఈ సందర్భంగా ఆర్డరు కాపీ అందిన 48 గంటల్లోగా విచారణ అధికారి ముందు హాజరు కావాలని విరూపాక్షప్పను హైకోర్టు ఆదేశించింది. రూ.5లక్షల పూచీకత్తుతో బెయిల్‌ మంజూరు చేస్తున్నట్లు పేర్కొంది. బెయిల్‌ పొందిన నేపథ్యంలో ఎటువంటి ఆధారాలను చెడగొట్టేందుకు ప్రయత్నించవద్దని ఆదేశించిన న్యాయస్థానం.. తదుపరి విచారణను మార్చి 17కు వాయిదా వేసింది.

ఓ గుత్తేదారు నుంచి లంచం తీసుకుంటూ భాజపా ఎమ్మెల్యే విరూపాక్షప్ప కుమారుడు ప్రశాంత్‌ లోకాయుక్తకు చిక్కారు. ప్రశాంత్‌ ఇల్లు, కార్యాలయంలో సోదాలు జరపగా.. సుమారు రూ.8కోట్లకు పైగా నగదు లభ్యమైంది. నగదుతోపాటు పెద్ద ఎత్తున భూముల పెట్టుబడులకు సంబంధించి డాక్యుమెంట్లతోపాటు బంగారం, వెండి కూడా గుర్తించినట్లు లోకాయుక్త వర్గాలు వెల్లడించాయి.