Karnataka: నియామక పరీక్షల్లో అక్రమాలకు పాల్పడితే.. 10ఏళ్ల వరకు జైలు, రూ.10కోట్ల జరిమానా!

బెళగావి: ప్రభుత్వ నియామక పరీక్షల్లో అవకతవకలు, అవినీతి కార్యకలాపాలను కట్టడి చేసేందుకు కర్ణాటక ప్రభుత్వం కఠిన చర్యలు తీసుకోనుంది. ఇందులో భాగంగా ఎవరైనా అక్రమాలకు పాల్పడితే కఠిన చర్యలు తీసుకునేలా చట్టాన్ని తీసుకువచ్చేందుకు సిద్ధమైంది. ఇందుకు సంబంధించిన బిల్లును అసెంబ్లీలో ప్రవేశపెట్టింది. ఎవరైనా అవినీతి, అక్రమాలకు పాల్పడితే పదేళ్ల వరకు జైలు శిక్ష, రూ.10 కోట్ల జరిమానా విధించడం వంటి ప్రతిపాదనలను అందులో పొందుపరిచింది.

కర్ణాటక పబ్లిక్‌ ఎగ్జామినేషన్‌ (అవినీతి, అక్రమ మార్గాల నివారణ చర్యలు) బిల్లు-2023 పేరుతో అసెంబ్లీలో ఈ బిల్లును ప్రవేశపెట్టింది. రాష్ట్ర ప్రభుత్వంతోపాటు స్వయం ప్రతిపత్తి సంస్థలు, వివిధ బోర్డులు, కార్పొరేషన్ల నియామకాల్లో ప్రశ్నపత్రాల లీకేజీ, నియామకం కోసం అక్రమ మార్గాలను ఎంచుకోవడం, అవకతవకలకు పాల్పడిన వారిపై కఠిన శిక్షలు ఉంటాయని అందులో ప్రతిపాదించింది. నేరం రుజువైతే పదేళ్ల వరకు జైలుశిక్ష, రూ.10కోట్ల జరిమానా వంటి చర్యలు ఉంటాయని ప్రభుత్వం హెచ్చరించింది. వీటితోపాటు ఆస్తులను జప్తు చేసే అవకాశం కూడా ఉందని అందులో పేర్కొంది.