Kunal Kamra: అరెస్టు నుంచి రక్షణ కల్పించండి.. న్యాయస్థానాన్ని ఆశ్రయించిన కుణాల్‌ కామ్రా

ఇంటర్నెట్‌ డెస్క్‌: అరెస్టు నుంచి తనకు రక్షణ కల్పించాలని స్టాండప్‌ కమెడియన్‌ కుణాల్‌ కామ్రా (Kunal Kamra) మద్రాస్‌ హైకోర్టును ఆశ్రయించారు. మహారాష్ట్ర డిప్యూటీ సీఎం ఏక్‌నాథ్ శిందే (Eknath Shinde)పై వివాదాస్పద వ్యాఖ్యలు చేసిన విషయంలో ఆయనపై పలు కేసులు నమోదయ్యాయి. ఈనేపథ్యంలో పోలీసులు తనను అరెస్ట్‌ చేయకుండా ముందస్తు బెయిల్‌ ఇవ్వాలని న్యాయస్థానానికి విజ్ఞప్తి చేశారు. ఈ కేసులు మహారాష్ట్రలో నమోదైనప్పటికీ అతడు తమిళనాడుకు చెందినవాడు కావడంతో మద్రాసు హైకోర్టును ఆశ్రయించినట్లు తెలుస్తోంది.

ఇటీవల ముంబయిలో కుణాల్‌ కామ్రా హాస్య వినోద కార్యక్రమం నిర్వహించారు. ఇందులో శిందేను ‘‘గద్దార్‌’’ (ద్రోహి)గా పేర్కొంటూ ఓ పేరడీ పాటను ఆలపించడం ఈ వివాదానికి కారణమైంది. ఉప ముఖ్యమంత్రిపై అవమానకర వ్యాఖ్యలు చేశారన్న కారణాన్ని చూపుతూ పోలీసులు ఆయనపై ఎఫ్‌ఐఆర్‌ నమోదు చేశారు. ఆ వ్యాఖ్యలకు నిరసనగా కార్యక్రమం వేదికపై శివసేన కార్యకర్తలు దాడి చేశారు. దీనిపై ఇటీవల స్పందించిన ఏక్‌నాథ్‌ శిందే.. కామ్రా వ్యాఖ్యలు ఒక వ్యక్తికి వ్యతిరేకంగా మాట్లాడేందుకు ‘సుపారీ’ తీసుకున్నట్లు ఉన్నాయన్నారు. వాక్‌ స్వాతంత్ర్యానికి, వ్యంగ్యానికి ఓ హద్దు ఉంటుందని పేర్కొన్నారు.