వ్యాను ప్రమాదం.. కుటుంబంలో 10 మందిని కోల్పోయి.. ఒంటరిగా మిగిలి!

ఛత్తీస్‌గఢ్‌: 40 మందికి పైగా ప్రయాణిస్తున్న ఓ వాహనం ఛత్తీస్‌గఢ్‌ (Chhattisgarh)లోని ఓ లోయలో పడిన ఘటన తీవ్ర విషాదాన్ని నింపింది. ఈ ఘటనలో మొత్తం 18 మంది ప్రాణాలు కోల్పోగా.. అందులో ఒకే కుటుంబానికి చెందిన 10 మంది మృత్యువాత పడినట్లు వెల్లడైంది. ఆ ప్రమాదం నుంచి ప్రాణాలతో బయటపడిన ఓ బాధితుడు, తన కుటుంబం మొత్తాన్ని కోల్పోయి ఒంటరిగా మిగిలానని వాపోయాడు. ఆ భయానక ఘటనను వివరించాడు. కబీర్‌ధామ్‌ జిల్లా బహపానీ గ్రామ సమీపంలో ఈ ప్రమాదం జరిగింది.

‘‘అడవిలోకి వెళ్లి బీడీ ఆకులు సేకరించి మూటలతో అందరం వాహనంలో తిరిగి పయనమయ్యాం. కొందరు మహిళలు, పురుషులు, చిన్నారులు కూడా అందులో ఉన్నారు. నేను డ్రైవర్‌ పక్కన కూర్చున్నా. ఆ సమయంలో బ్రేక్‌లు ఫెయిల్‌ అవడంతో డ్రైవర్‌ నియంత్రణ కోల్పోయాడు. దీంతో వెనక కూర్చున్నవారిని కిందికి దూకేయమని అప్రమత్తం చేశాం. ఓ రాయి మీదకి ఎక్కించి వాహనాన్ని అదుపు చేయాలనుకున్నాం. కానీ పరిస్థితి చేయి దాటిపోయింది. నేనూ కిందకు దూకి ప్రాణాలు దక్కించుకున్నా. అందరూ వాహనం నుంచి దూకే లోపే జరగాల్సిన నష్టం జరిగింది. నా భార్య సహా నా కుటుంబంలో 10 మందిని ఈ ప్రమాదంలో పోగొట్టుకున్నా’’ అని పరిస్థితిని వివరించాడు. మృతుల కుటుంబాలకు రాష్ట్ర సీఎం విష్ణుదేవ్‌సాయి ప్రగాఢ సానుభూతి తెలిపారు. బాధిత కుటుంబాలకు రూ.5 లక్షలు, క్షతగాత్రులకు రూ.50 వేల ఆర్థిక సాయం ప్రకటించారు.