Manipur: మణిపుర్‌ సీఎం ముందస్తు భద్రత వాహన శ్రేణిపై కాల్పులు

ఒకరికి గాయాలు

ఇంఫాల్‌: జాతుల మధ్య వైరంతో అల్లకల్లోలంగా ఉన్న మణిపుర్‌లో ముఖ్యమంత్రి బీరేన్‌ సింగ్‌ ముందస్తు భద్రత వాహన శ్రేణిపై సోమవారం కాల్పులు జరిగాయి. కాంగ్‌పోక్పీ జిల్లాలోని కోట్లెన్‌ గ్రామంవద్ద ఉదయం 10.30 గంటలకు జరిగిన ఈ ఘటనలో ఓ వాహన డ్రైవరు భుజానికి గాయాలయ్యాయి. అతడిని వెంటనే ఆసుపత్రికి తరలించారు. సాయుధులైన కొందరు దుండగులు ఈ కాల్పులకు తెగబడ్డారు. రాజధాని ఇంఫాల్‌కు 36 కిలోమీటర్ల దూరంలో ఉన్న ఘటనా స్థలికి భద్రతా సిబ్బంది వెంటనే చేరుకున్నారు. కూంబింగ్‌ ప్రారంభించారు. దిల్లీకి వెళ్లిన బీరేన్‌ సింగ్‌ ఇటీవల ఘర్షణలు జరిగిన ప్రాంతాన్ని సందర్శించాలనుకున్నారు. ఈ నేపథ్యంలో ముందస్తు భద్రత వాహన శ్రేణి ఆ ప్రాంతానికి బయలుదేరిన సందర్భంగా ఈ ఘటన చోటు చేసుకుంది. 

ఇటీవల జిరిబామ్‌ జిల్లాలో ఓ వ్యక్తిని గుర్తు తెలియని దుండగులు దారుణంగా హత్య చేశారు. ఈ ఘటనతో రాష్ట్రంలో ఉద్రిక్తతలు పెరిగాయి. 70కిపైగా ఇళ్లను తగులబెట్టడంతో శాంతి భద్రతల సమస్య తలెత్తింది. ఎన్నికల సమయంలో తమవద్ద నుంచి లైసెన్స్‌డ్‌ తుపాకులను జప్తు చేయడంతో ఈ ఘటన జరిగిందని, వాటిని తిరిగి ఇచ్చేయాలంటూ స్థానికులు పోలీస్‌స్టేషన్‌ ఎదుట నిరసనకు దిగారు. దీంతో ఈ ప్రాంతాన్ని సందర్శించాలని సీఎం బీరేన్‌ సింగ్‌ నిర్ణయించుకున్నారు. ఈ క్రమంలోనే ఇంఫాల్‌ నుంచి జిరిబామ్‌కు సీఎం ముందస్తు భద్రత వాహన శ్రేణి బయల్దేరింది. దీనిపై సాయుధులైన దుండగులు కాల్పులు జరిపారు. ఈ ఘటనను ముఖ్యమంత్రి బీరేన్‌ సింగ్‌ ఖండించారు. దిల్లీ నుంచి ఇంఫాల్‌ చేరుకున్న ఆయన గాయపడ్డ డ్రైవరును పరామర్శించారు. ఇది ముఖ్యమంత్రిపై, రాష్ట్ర ప్రజలపై జరిగిన దాడి అని వ్యాఖ్యానించారు.