Bengaluru: రామేశ్వరం కేఫ్ పేలుడు కేసు.. ఏపీ, తెలంగాణ సహా నాలుగు రాష్ట్రాల్లో ఎన్‌ఐఏ సోదాలు

బెంగళూరు: రామేశ్వరం కెఫే (Rameshwaram Cafe)లో బాంబు పేలుడు కేసులో అనేక కోణాలు బయటకు వస్తున్నాయి. ఈ కుట్రకు సహకరించిన వారిని గుర్తించేందుకు జాతీయ దర్యాప్తు సంస్థ (NIA) తీవ్రంగా యత్నిస్తోంది. ఇందులో భాగంగా తాజాగా ఆంధ్రప్రదేశ్‌, తెలంగాణ సహా నాలుగు రాష్ట్రాల్లో సోదాలు జరిపింది. పలువురు అనుమానితులను గుర్తించిన ఎన్‌ఐఏ, డిజిటల్‌ పరికరాలు, కీలక డాక్యుమెంట్లను స్వాధీనం చేసుకుంది.

ఈ ఘటనలో ఇప్పటికే పలువురు నిందితులను ఎన్‌ఐఏ అధికారులు అరెస్టు చేశారు. వారి నుంచి సేకరించిన కీలక సమాచారం ఆధారంగా మరికొంత మందికి సంబంధమున్నట్లు అనుమానించారు. ఈ క్రమంలోనే ఏపీ, తెలంగాణ, కర్ణాటక, తమిళనాడు రాష్ట్రాల్లో మొత్తం 11 చోట్ల సోదాలు జరిపారు. పలువురు అనుమానితులను గుర్తించినట్లు సమాచారం. బెంగళూరులోని కుమారస్వామి లేఅవుట్‌, బానాశంకరీ తదితర ప్రాంతాల్లో దాడులు చేసినట్లు వెల్లడించారు.

ఈ కేసును ఎన్‌ఐఏ మార్చి 3న తన పరిధిలోకి తీసుకుంది. అనంతరం కీలక సూత్రధారి అబ్దుల్‌ మథీన్‌ అహ్మద్‌ తాహాతోపాటు మరో నిందితుడిని ఏప్రిల్‌ 12న కోల్‌కతాలో అరెస్టు చేసింది. కేఫ్‌లో బాంబును అమర్చింది తహాయేనని భావిస్తున్నారు. వీరిద్దరూ శివమొగ్గ కేంద్రంగా పనిచేస్తున్న ఓ సంస్థకు చెందిన వారిగా గుర్తించారు. తాజా సోదాల్లో భాగంగా 2012లో బెంగళూరు, హుబ్లీల్లో పేలుళ్ల కుట్ర కేసులో నిందితులుగా ఉన్నవారి ఇళ్లలోనూ ఎన్‌ఐఏ బృందం దాడులు చేసింది.