India-Maldives: మాల్దీవులు ఆ ప్రతిపాదన చేస్తే.. పరిశీలిస్తాం: భారత్‌

దిల్లీ: ద్వీపదేశం మాల్దీవులతో (Maldives) ద్వైపాక్షిక స్వేచ్ఛా వాణిజ్య ఒప్పందంపై (Bilateral Free Trade Agreement) భారత్‌ తన అభిప్రాయాన్ని వెలిబుచ్చింది. ఇప్పటివరకు అలాంటి ప్రతిపాదనేమీ చేయలేదని, ఒకవేళ ఆ దేశం ఆసక్తి చూపిస్తే పరిశీలించి, పరిగణనలోకి తీసుకునేందుకు సిద్ధంగా ఉన్నామని తెలిపింది. ఈమేరకు విదేశీ వ్యవహారాల శాఖ అధికార ప్రతినిధి రణధీర్‌ జైశ్వాల్‌ (Randhir Jaiswal) వెల్లడించారు. మాల్దీవులతో స్వేచ్ఛా వాణిజ్యం కోసం భారత్ ప్రయత్నాలు మొదలుపెట్టిందంటూ గతవారం ఆ దేశ వాణిజ్య, ఆర్థికాభివృద్ధి శాఖ మంత్రి మహమ్మద్‌ సయీద్‌ వ్యాఖ్యానించిన సంగతి తెలిసిందే. ఈ క్రమంలో దిల్లీలో నిర్వహించిన విలేకరుల సమావేశంలో దీనిపై ప్రశ్నించగా రణధీర్‌ బదులిచ్చారు.

దక్షిణాసియా స్వేచ్ఛా వాణిజ్య ఒప్పందంతోపాటు, మాల్దీవులతో మరో ఒప్పందం కుదుర్చుకునేందుకు భారత్‌ అడుగులు వేస్తోందని మాలెలో ఏర్పాటుచేసిన మీడియా సమావేశంలో సయీద్‌ పేర్కొన్నారు. అధ్యక్షుడు మహమ్మద్‌ ముయిజ్జు ఈ అవకాశాన్ని అన్ని దేశాలకు ఇస్తారన్నారు. వీలైనన్ని ఎక్కువ దేశాలతో వాణిజ్య ఒప్పందాలను కుదుర్చుకునేందుకు మాల్దీవులు ఎప్పుడూ సిద్ధంగా ఉంటుందన్నారు. గతేడాది నవంబర్‌లో ముయిజ్జు మాల్దీవుల అధ్యక్షుడిగా ఎన్నికైనప్పటినుంచి భారత్‌తో సంబంధాలు అంతంతమాత్రంగానే కొనసాగుతున్నాయి. చైనా అనుకూల విధానాలను అవలంబిస్తూ.. ఆ దేశం భారత్‌కు దూరమవుతోంది. ముయిజ్జు అధ్యక్షుడిగా ఎన్నికైన గంటల వ్యవధిలోనే దేశం నుంచి భారత మిలటరీ దళాలు వెళ్లిపోవాల్సిందిగా గడువు విధించారు. ఈనెల మొదట్లోనే ఈ ప్రక్రియ పూర్తయింది.