Simultaneous polls: ‘జమిలి’పై నివేదికకు కోవింద్‌ కమిటీకి నిర్దిష్ట కాలపరిమితి లేదు: కేంద్రం

దిల్లీ: దేశంలో జమిలి ఎన్నికల నిర్వహణలో సాధ్యాసాధ్యాలపై అధ్యయనానికి భారత మాజీ రాష్ట్రపతి రామ్‌నాథ్‌ కోవింద్‌ (Ramnath kovind) నేతృత్వంలో ఏర్పాటైన ఉన్నతస్థాయి కమిటీ తన నివేదిక సమర్పించేందుకు నిర్దిష్టమైన కాలపరిమితి ఏదీ లేదని కేంద్రం తెలిపింది. కేంద్ర న్యాయశాఖ మంత్రి అర్జున్‌రామ్‌ మేఘ్వాల్‌ లోక్‌సభకు ఇచ్చిన లిఖితపూర్వక సమాధానంలో ఈ విషయాన్ని వెల్లడించారు. ఒకే దేశం- ఒకే ఎన్నిక అంశంపై రాజకీయ పార్టీల నుంచి ఇప్పటివరకు 35 స్పందనలు అందాయన్నారు. అయితే, ఈ కమిటీ నివేదిక సమర్పించేందుకు మాత్రం ఎలాంటి తుది గడువు విధించలేదని ఆయన స్పష్టంచేశారు. దేశంలో లోక్‌సభ, రాష్ట్ర అసెంబ్లీలు, మున్సిపాల్టీలు, పంచాయతీలకు ఏకకాలంలో ఎన్నికల నిర్వహణ కసరత్తులో భాగంగా గతేడాది సెప్టెంబర్‌లో రామ్‌నాథ్‌ కోవింద్‌ సారథ్యంలో ఉన్నతస్థాయి కమిటీని నియమించిన విషయం తెలిసిందే.