NEET UG 2025: ‘నీట్‌’ పరీక్షపై అసత్య ప్రచారం.. 120కి పైగా టెలిగ్రామ్‌, ఇన్‌స్టా ఛానళ్లపై చర్యలు!

దిల్లీ: వైద్య విద్య కోర్సుల్లో ప్రవేశాల కోసం నిర్వహించే నీట్‌(యూజీ) పరీక్షకు (NEET  UG 2025) సంబంధించి అసత్య ప్రచారం చేస్తున్న వారిపై ఎన్‌టీఏ(NTA) చర్యలు చేపట్టింది. ఈ పరీక్షపై తప్పుదారిపట్టించే సమాచారాన్ని ఆన్‌లైన్‌లో ప్రచారం చేస్తున్న దాదాపు 120కి పైగా సామాజిక మాధ్యమ ఖాతాల్ని గుర్తించి కేసులు నమోదు చేసినట్లు సమాచారం. వీటిలో 106 టెలిగ్రామ్‌, 16 ఇన్‌స్టాగ్రామ్‌ ఛానళ్లు ఉన్నట్లు ఎన్‌టీఏ వర్గాలు పేర్కొన్నాయి. ఈ ఛానళ్లపై తదుపరి దర్యాప్తు కోసం కేసులను కేంద్ర హోంమంత్రిత్వ శాఖ పరిధిలోని సైబర్ క్రైమ్ కోఆర్డినేషన్ సెంటర్‌కు బదిలీ చేసినట్లు సమాచారం. అలాగే, అసత్య ప్రచారాన్ని, విద్యార్థుల్లో అనవసర భయాందోళనల్ని నివారించేందుకు ఈ ఛానళ్లను తొలగించాలని టెలిగ్రామ్‌, ఇన్‌స్టాగ్రామ్‌ సంస్థలను సైతం కోరినట్లు తెలుస్తోంది.

• నీట్‌ (యూజీ) అడ్మిట్‌ కార్డులు విడుదల.. డౌన్‌లోడ్‌ కోసం క్లిక్‌ చేయండి

నీట్‌ ప్రశ్నపత్రం గురించి తప్పుడు ప్రచారం చేసే అనధికార వెబ్‌సైట్‌లు/సోషల్‌ మీడియా ఖాతాలు; పరీక్ష కంటెంట్‌ యాక్సెస్‌కు సంబంధించి క్లెయిమ్‌ చేసే వ్యక్తుల గురించి ఫిర్యాదు చేసేందుకు ఎన్‌టీఏ ఇటీవల కొత్త వేదికను ప్రారంభించిన విషయం తెలిసిందే. ఈ పరీక్షకు సంబంధించి అనుమానాస్పద కంటెంట్‌ ప్రచారం చేసినట్లు గుర్తిస్తే https://neetclaim.centralindia.cloudapp.azure.com/ ద్వారా రిపోర్టు చేయవచ్చని విద్యార్థులు, తల్లిదండ్రులకు సూచించింది. ఈ నేపథ్యంలో ఇప్పటివరకు 1500కు పైగా ఫిర్యాదులు అందగా..  వీటిలో అధిక భాగం టెలిగ్రామ్‌ ఛానల్‌ లింక్‌లే ఉన్నట్లు తెలుస్తోంది. మరోవైపు, ఈ ఏడాది మే 4న జరగనున్న నీట్‌ యూజీ పరీక్షకు రంగం సిద్ధం చేసింది. నీట్‌ అడ్మిట్ కార్డుల్ని నిన్ననే విడుదల చేసింది.