Bhagwant Mann: కల్తీ మద్యం మరణాల వేళ.. సీఎం సింగింగ్ వీడియో వైరల్‌

చండీగఢ్‌: కల్తీ మద్యం తాగడంతో పంజాబ్‌ (Punjab)లోని సంగ్రూర్ నియోజకవర్గంలోని దిర్భా ప్రాంతంలో మరణాలు సంభవిస్తున్నాయి. ఈ సమయంలో ముఖ్యమంత్రి భగవంత్‌ మాన్‌ (Bhagwant Mann) పాట పాడుతున్న వీడియో ఒకటి వెలుగులోకి వచ్చింది. దాంతో విపక్ష పార్టీలు కాంగ్రెస్‌, భాజపా ఆయనపై విమర్శలు గుప్పిస్తున్నాయి.

ఆ వీడియోలో ఒక కారులో భగవంత్‌ మాన్(Bhagwant Mann).. గాయకులు సుఖ్వీందర్‌ సింగ్, బబ్బూ మన్‌తో కలిసి పాటలు పాడినట్లు కనిపిస్తోంది. ఆ దృశ్యాలను భాజపా పంజాబ్‌ అధ్యక్షుడు సునీల్ జాఖడ్ ఎక్స్‌(ట్విటర్‌)లో పోస్టు చేశారు. ‘రోమ్ తగలబడుతుంటే నీరో చక్రవర్తి ఫిడేల్ వాయించినట్లు.. సొంత నియోజకవర్గంలో కల్తీ మద్యంతో ప్రజలు చనిపోతుంటే సీఎం పాటలు పాడుతున్నారు. నాయకుడు లేని రాష్ట్రం చుక్కాని లేని పడవ వంటిది. అది నిజం’ అని తీవ్ర విమర్శలు చేశారు. ‘కల్తీ మద్యం తాగి ఇప్పటివరకు 8 మంది చనిపోయారు. ఘటనా స్థలం సీఎం సొంత జిల్లాలోనిది. కానీ ఆ సమస్యను పరిష్కరించడంలో ఆప్‌ ప్రభుత్వం దారుణంగా విఫలమైంది’ అని కాంగ్రెస్ నేత ప్రతాప్‌సింగ్ బజ్వా మండిపడ్డారు.

2022లో ముఖ్యమంత్రిగా బాధ్యతలు స్వీకరించే ముందు వరకు భగవంత్ మాన్ సంగ్రూర్ లోక్‌సభ నియోజకవర్గానికి ప్రాతినిధ్యం వహించారు. ఇదిలాఉంటే.. ఈ ఘటనపై తాము దర్యాప్తు జరుపుతున్నామని పోలీసులు తెలిపారు. 2023లో కూడా సంగ్రూర్‌లో ఇదేతరహా ఘటన జరిగింది. ఆ సమయంలో ముగ్గురు వ్యక్తులు ప్రాణాలు కోల్పోయారు.