Online Betting: రూ.కోటి గెల్చుకున్న ఆనందం.. మద్యం తాగి వికృత చేష్టలు

ఆన్‌లైన్‌ క్రికెట్‌ బెట్టింగ్‌ యాప్‌ డ్రీమ్‌ 11 ద్వారా రూ.కోటికి పైగా గెలుచుకున్న ఓ వ్యక్తి ఆనందం పట్టలేక అతిగా మద్యం తాగి బీభత్సం సృష్టించాడు. పోలీసులనూ బెదిరించాడు. ఉత్తరాఖండ్‌లోని సిడ్కుల్‌ ప్రాంతానికి చెందిన మహేష్‌ సింగ్‌ ధామి అనే వ్యక్తి డ్రీమ్‌ 11 యాప్‌లో రూ.కోటి బహుమతి గెలుచుకున్నాడు. ఈ ఆనందంలో మద్యం తాగి వీధుల్లోకి వచ్చి దురుసుగా ప్రవర్తించాడు. అతడిని ఆపేందుకు స్థానికులు ప్రయత్నించినప్పటికీ మాట వినకపోవడంతో పోలీసులకు సమాచారం అందించారు. నిందితుడిని వారు అదుపులోకి తీసుకుంటున్న క్రమంలో తాను ముఖ్యమంత్రికి బంధువునని చెబుతూ హెచ్చరించాడు. పోలీసుల యూనిఫాం విప్పమంటూ వికృత చేష్టలకు దిగాడు. చివరకు అతణ్ని అదుపులోకి తీసుకుని కేసు నమోదు చేశారు.