Prem Singh Tamang: సిక్కిం సీఎంగా ప్రేమ్‌సింగ్‌ తమాంగ్‌ ప్రమాణం

గ్యాంగ్‌టక్‌: హిమాలయ రాష్ట్రం సిక్కింలో కొత్త ప్రభుత్వం కొలువుదీరింది. సిక్కిం క్రాంతికారీ మోర్చా (ఎస్‌కేఎం) అధ్యక్షుడు ప్రేమ్‌సింగ్‌ తమాంగ్‌ (56) వరుసగా రెండోసారి ఆ రాష్ట్ర ముఖ్యమంత్రిగా బాధ్యతలు చేపట్టారు. గ్యాంగ్‌టక్‌లోని పల్జోర్‌ స్టేడియంలో గవర్నర్‌ లక్ష్మణ్‌ ప్రసాద్‌ ఆచార్య సోమవారం ఆయనతో ప్రమాణం చేయించారు. మరో 12 మంది మంత్రులుగా ప్రమాణం చేశారు. సిక్కింలో మొత్తం 32 అసెంబ్లీ నియోజకవర్గాలు ఉన్నాయి. ఇటీవలి ఎన్నికల్లో ఎస్‌కేఎం వాటిలో ఏకంగా 31 సీట్లు గెల్చుకోవడం ద్వారా ప్రభంజనం సృష్టించింది. సీఎంగా రెండోసారి బాధ్యతలు చేపట్టిన తమాంగ్‌కు ప్రధాని మోదీ ‘ఎక్స్‌’ వేదికగా శుభాకాంక్షలు తెలిపారు.