Ashok Gehlot: ఇంట్లో జారి పడ్డ రాజస్థాన్‌ సీఎం గహ్లోత్‌.. కాలి వేళ్లకు గాయాలు

జైపుర్‌: రాజస్థాన్‌ ముఖ్యమంత్రి అశోక్‌ గహ్లోత్‌(Ashok Gehlot) పాదాలకు, రెండు కాలి వేళ్లకు గాయాలు కావడంతో ఆసుపత్రిలో చేరారు. ఓ సమావేశంలో పాల్గొని జైపుర్‌లోని ఇంటికి చేరుకున్న ఆయన గదిలోకి వెళ్లే క్రమంలో జారి పడ్డారు. దీంతో ఆయన రెండు కాలి వేళ్లకు గాయాలు అయ్యాయి. ఒక కాలివేలు విరిగినట్టు సమాచారం. సిబ్బంది వెంటనే దగ్గర్లోని ఎస్‌ఎంఎస్‌ ఆసుపత్రికి తరలించారు. అక్కడ చికిత్స చేసిన అనంతరం వీల్‌ ఛైర్‌లో గహ్లోత్‌ ఇంటికి చేరుకున్నారు. ఈ మేరకు ఆయన ట్వీట్‌ చేశారు. జారి పడడంతో కాలి వేళ్లకు గాయాలు అయ్యాయి. వైద్యుల సలహా మేరకు కొన్ని రోజుల పాటు ఇంట్లోనే ఉండి విధులు నిర్వహిస్తాను అని తెలిపారు.