Parliament: పట్టు వీడని విపక్షాలు.. ఉభయ సభలు వాయిదా

దిల్లీ: పార్లమెంట్ శీతాకాల సమావేశాల్లో వాయిదాల పర్వం కొనసాగుతోంది. గురువారం 14 మంది ప్రతిపక్ష ఎంపీలపై సస్పెన్షన్‌ అనంతరం వాయిదా పడిన ఉభయ సభలు శుక్రవారం ఉదయం తిరిగి ప్రారంభమయ్యాయి. ఈ నేపథ్యంలో పార్లమెంట్‌లో భద్రతా వైఫల్యంపై కేంద్ర హోం మంత్రి ప్రకటనకు పట్టు బడుతూ.. మరోసారి విపక్ష ఎంపీలు ఆందోళన చేపట్టడంతో లోక్‌సభను స్పీకర్ మధ్యాహ్నం రెండు గంటల వరకు వాయిదా వేశారు. మరోవైపు రాజ్యసభలో ప్రతిపక్ష ఎంపీలు కూడా ఇదే అంశంపై చర్చకు డిమాండ్‌ చేయడంతో ఛైర్మన్‌ జగదీప్‌ ధన్‌ఖడ్‌ సభను మధ్యాహ్నం రెండు గంటల వరకు వాయిదా వేశారు. అన్ని పార్టీల ఫ్లోర్‌ లీడర్లను తన ఛాంబర్‌లో సమావేశానికి ఆహ్వానించారు. ఉభయ సభల ప్రారంభానికి ముందు ఇండియా కూటమి ఎంపీలు కాంగ్రెస్‌ అధ్యక్షుడు మల్లికార్జున ఖర్గే నివాసంలో భేటీ అయ్యారు. ఈ క్రమంలోనే గురువారం సస్పెన్షన్‌కు గురైన ఎంపీలు పార్లమెంట్‌ ఆవరణలోని గాంధీ విగ్రహం ఎదుట నిరనస వ్యక్తం చేశారు.