Delhi Liquor Case: కీలక పరిణామం.. వాంగ్మూలాన్ని వెనక్కి తీసుకున్న రామచంద్రపిళ్లై

దిల్లీ: దిల్లీ మద్యం కేసులో కీలక పరిణామం చోటుచేసుకుంది. ఈ కేసులో నిందితుడిగా ఉన్న అరుణ్‌ రామచంద్ర పిళ్లై తన వాంగ్మూలాన్ని వెనక్కి తీసుకుంటున్నట్లు తెలిపారు. ఈ మేరకు దిల్లీలోని రౌస్‌ అవెన్యూలోని సీబీఐ ప్రత్యేక న్యాయస్థానంలో ఆయన పిటిషన్‌ దాఖలు చేశారు. 

భారాస ఎమ్మెల్సీ కవితకు తాను బినామీనంటూ ఇటీవల ఎన్‌ఫోర్స్‌మెంట్‌ డైరెక్టరేట్‌ (ఈడీ)కి ఇచ్చిన వాంగ్మూలంలో రామచంద్ర పిళ్లై పేర్కొన్నారు. తాజాగా ఆ వాంగ్మూలాన్ని వెనక్కి తీసుకుంటానని.. దీనికి అనుమతించాలని ఆయన కోరారు. మిగతా విచారణకు సహకరిస్తానని తెలిపారు. రామచంద్ర పిళ్లై పిటిషన్‌ నేపథ్యంలో ఈడీకి సీబీఐ ప్రత్యేక న్యాయస్థానం నోటీసులు జారీ చేసింది. ఈనెల 13 వరకు ఈడీ కస్టడీలో పిళ్లై ఉండనున్నారు.