Viral news: పోలీసులు కళ్లుగప్పి.. జైలు గోడపై నుంచి దూకేసి.. చివరికి!

బెంగళూరు: అత్యాచారం కేసులో విచారణ ఖైదీగా ఉన్న ఓ నిందితుడు పోలీసుల కళ్లు గప్పి తప్పించుకోవాలనుకున్నాడు. పక్కా ప్రణాళిక ప్రకారం జైలు చుట్టూ నిర్మించిన 40 అడుగుల ఎత్తైన గోడ నుంచి కిందికి దూకేశాడు. దీంతో అతడి కాలి ఎముక విరిగిపోయింది. బాధతోనే అలా కుంటుకుంటూ.. అటువైపుగా వస్తున్న ఆటో ఎక్కి పరారయ్యాడు. ఈ ఘటన కర్ణాటకలోని దావణగిరె కారాగారంలో శుక్రవారం జరిగింది. దీనికి సంబంధించిన దృశ్యాలు అక్కడ ఏర్పాటు చేసిన సీసీ కెమెరాల్లో నిక్షిప్తమయ్యాయి. అయితే, ఒక్క రోజు వ్యవధిలోనే నిందితుడిని మళ్లీ అరెస్టు చేసినట్లు బెంగళూరు పోలీసులు వెల్లడించారు. నిందితుడు తప్పించుకున్న వీడియో ప్రస్తుతం సామాజిక మాధ్యమాల్లో వైరల్‌ అవుతోంది.