Electoral Bonds: సుప్రీం తీర్పుపై జోక్యం చేసుకోండి : రాష్ట్రపతికి ‘సుప్రీం’ బార్‌ అసోసియేషన్‌ లేఖ

ఇంటర్నెట్‌ డెస్క్‌: ఎన్నికల బాండ్లు రాజ్యాంగ విరుద్ధమంటూ భారత సర్వోన్నత న్యాయస్థానం (Supreme Court) ఇచ్చిన తీర్పుపై ప్రెసిడెన్షియల్‌ రిఫరెన్స్‌ కోరాలని రాష్ట్రపతి ద్రౌపదీ ముర్ముకు సుప్రీం కోర్టు బార్‌ అసోసియేషన్‌ (SCBA) అధ్యక్షుడు ఆదీశ్‌ సీ అగర్వాలా విజ్ఞప్తి చేశారు. ఆల్‌ ఇండియా బార్‌ అసోసియేషన్‌ లెటర్‌ హెడ్‌లో రాష్ట్రపతికి లేఖ రాసిన ఆయన.. ఈ అంశాన్ని మళ్లీ విచారించే వరకు ఆ తీర్పు అమలు చేయకుండా చూడాలన్నారు.

‘రాజకీయ పార్టీలకు విరాళాలు ఇచ్చిన కార్పొరేట్ల పేర్లను బహిరంగ పరిస్తే వారు బాధితులుగా మారే అవకాశం ఉంది. తక్కువ విరాళాలు ఇచ్చిన వారిని సదరు పార్టీలు దూరం పెట్టడం, వారిని వేధింపులకు గురిచేసే అవకాశాలు ఉన్నాయి. స్వచ్ఛంద విరాళాలను అంగీకరించేటప్పుడు వారికి ఇచ్చిన వాగ్దానాన్ని విస్మరించడమే అవుతుంది’ అని రాష్ట్రపతికి రాసిన లేఖలో అగర్వాలా పేర్కొన్నారు. అందుకే ఈ కేసులో ప్రెసిడెన్షియల్‌ రిఫరెన్స్‌ను తీసుకోవాలని రాష్ట్రపతికి విజ్ఞప్తి చేశారు.