Puri Temple: పూరీ క్షేత్రంలో తొక్కిసలాట.. 10 మందికి గాయాలు

కటక్‌: ఒడిశా (Odisha)లోని ప్రముఖ పుణ్యక్షేత్రమైన పూరీ జగన్నాథస్వామి (Puri Jagannath temple) ఆలయంలో శుక్రవారం ఉదయం తొక్కిసలాట (Stampede) చోటుచేసుకుంది. ఈ ఘటనలో 10 మంది భక్తులు గాయపడ్డారు. క్షతగాత్రులను పూరీ ప్రభుత్వాసుపత్రికి తరలించి చికిత్స అందిస్తున్నారు.

ఒడియా పంచాంగం ప్రకారం.. గత పౌర్ణమి నుంచి కార్తిక మాసం ప్రారంభమైంది. కార్తిక శుక్రవారాన్ని పురస్కరించుకుని నేడు పెద్ద ఎత్తున భక్తులు పూరీ జగన్నాథుని దర్శనానికి తరలివచ్చారు. ఈ క్రమంలోనే ఉదయం ‘మంగళ ఆలటి’ నిర్వహించిన తర్వాత ఒక్కసారిగా భక్తులు లోపలికి ప్రవేశించేందుకు యత్నించారు. దీంతో ఆలయం మెట్లపై తొక్కిసలాట జరిగింది.