Sundar Pichai: గూగుల్‌ సీఈవో చిన్ననాటి ఇల్లు విక్రయం.. తండ్రి కన్నీటిపర్యంతం!

చెన్నై: గూగుల్‌ సీఈవో సుందర్‌ పిచాయ్‌ (Sundar Pichai) తమిళనాడు (Tamil Nadu)లో పుట్టి పెరిగిన ఇంటిని విక్రయించారు. తమిళ సినీ నటుడు, నిర్మాత సి.మణికందన్ (C Manikandan) కొనుగోలు చేశారు. చెన్నై (Chennai)లోని అశోక్‌ నగర్‌లో సుందర్ పిచాయ్ నివసించిన ఇల్లు (Sundar Pichai Home) అమ్మకానికి ఉందని తెలిసిన క్షణమే దాని కొనుగోలుకు మణికందన్‌ ముందుకు వచ్చినట్లు ఓ వార్తాసంస్థ వెల్లడించింది. ఆ ఇంటిని కూల్చివేసి, స్థలానికి సంబంధించిన ఆస్తి పత్రాలు అందజేసే సమయంలో సుందర్‌ తండ్రి రఘునాథ పిచాయ్‌ భావోద్వేగంతో కన్నీటి పర్యంతమయ్యారని మణికందన్‌ వెల్లడించారు.

‘సుందర్ పిచాయ్ మన దేశాన్ని గర్వపడేలా చేశారు. ఆయన నివసించిన ఇంటి స్థలాన్ని కొనుగోలు చేయడం నా జీవితంలో గర్వించదగ్గ విజయం’ అని మణికందన్ పేర్కొన్నారు. స్థిరాస్తి కొనుగోలు లావాదేవీలు సాగుతోన్న వేళ సుందర్‌ తల్లిదండ్రుల మర్యాద తనను కదిలించిందని తెలిపారు. ‘సుందర్ తల్లి స్వయంగా ఫిల్టర్ కాఫీ చేసి ఇచ్చారు. ఆయన తండ్రి మొదటి సమావేశంలోనే నాకు సంబంధిత పత్రాలు అందించారు. వారి వినయపూర్వక వ్యవహార శైలిని చూసి ఆశ్చర్యపోయా’ అని వెల్లడించారు.

‘సుందర్‌ తండ్రి రిజిస్ట్రేషన్ కార్యాలయంలో గంటల తరబడి వేచి ఉన్నారు. నాకు పత్రాలు ఇవ్వడానికి ముందు అవసరమైన అన్ని పన్నులు చెల్లించారు. ఇంటిని కూల్చేందుకు అయిన ఖర్చునూ భరించారు. ఇది ఆయన మొదటి ఆస్తి కాబట్టి.. పత్రాలను అందజేసేటప్పుడు భావోద్వేగంతో కన్నీటి పర్యంతమయ్యారు’ అని మణికందన్ తెలిపారు. ఇదిలా ఉండగా.. ఐఐటీ ఖరగ్‌పుర్‌కు వెళ్లేవరకు సుందర్‌ పిచాయ్‌ తన 20 ఏళ్ల వరకు ఈ ఇంట్లోనే ఉన్నట్లు సమాచారం. గతేడాది ఓసారి చెన్నైకి వచ్చి వెళ్లారు.