Supreme Court: అతీక్‌ను ఊరేగింపుగా ఎందుకు తీసుకెళ్లారు?: యూపీ ప్రభుత్వానికి సుప్రీం ప్రశ్న

దిల్లీ: రాజకీయ నేతగా ఎదిగిన ఉత్తర్‌ప్రదేశ్‌(Uttar Pradesh) గ్యాంగ్‌స్టర్‌, మాజీ ఎంపీ అతీక్‌ అహ్మద్‌, అతడి సోదరుడు అష్రాఫ్‌లను జర్నలిస్టులుగా వచ్చిన ముగ్గురు వ్యక్తులు ఇటీవల కాల్పిచంపారు. వైద్య పరీక్షలకు తరలిస్తోన్న తరుణంలో వారు హత్యకు గురయ్యారు. పోలీసు కస్టడీలో ఉన్న వారు ఈ విధంగా మృతి చెందడంపై పలు అనుమానాలు వ్యక్తం అయ్యాయి. దానిపై తాజాగా సుప్రీంకోర్టు( Supreme Court).. ఉత్తర్‌ప్రదేశ్‌ ప్రభుత్వాన్ని నివేదిక కోరింది. 

‘మేం ఈ ఘటనను టీవీలో చూశాం. అతీక్‌, అతడి సోదరుడిని ఆసుపత్రికి అంబులెన్స్‌లో ఎందుకు తరలించలేదు..? వారిని నడిపించుకుంటూ ఊరేగింపుగా ఎందుకు తీసుకెళ్లారు..?’ అని కోర్టు ప్రశ్నించింది. దీనిపై యూపీ ప్రభుత్వం కోర్టులో తన వాదన వినిపించింది. ‘కోర్టు ఆదేశాలకు అనుగుణంగానే ఆ ఇద్దరు సోదరులను వైద్య పరీక్షలకు తీసుకెళ్లాం. ఈ విషయం మీడియాకు తెలిసింది. గత 30 సంవత్సరాలుగా అతీక్ కుటుంబంపై చాలా కేసులున్నాయి. అయితే ఇది దారుణమైన ఘటన. మేం హంతకులను అదుపులోకి తీసుకున్నాం. వారు పేరుకోసమే ఇదంతా చేశామని చెప్పారు. ప్రతి ఒక్కరు ఆ హత్యలను టీవీలో చూశారు. ఆ హంతకులు జర్నలిస్టులుగా వచ్చి కాల్పులు జరిపారు. ఆ ఘటనపై విచారణకు ఓ కమిషన్‌ను ఏర్పాటుచేశాం’ అని వెల్లడించింది. ఇదిలా ఉంటే..అంతకుముందు స్పెషల్ టాస్క్‌ ఫోర్స్‌ ఎన్‌కౌంటర్‌లో అతీక్‌ కుమారుడు అసద్ మృతి చెందిన సంగతి తెలిసిందే. ఈ ఘటనపై కూడా సుప్రీం( Supreme Court) నివేదిక కోరింది.