‘ఒంటరిగా బయటకు వెళ్లొద్దు’.. The Kerala Story చిత్రబృందానికి బెదిరింపులు

ముంబయి: సుదీప్తో సేన్‌ దర్శకత్వంలో తెరకెక్కిన చిత్రం ‘ది కేరళ స్టోరీ’(The Kerala Story). ఇటీవల ప్రేక్షకుల ముందుకు వచ్చిన ఈ చిత్రం ప్రస్తుతం హాట్‌టాపిక్‌గా మారింది. ఈ సినిమా ప్రదర్శనకు కొన్ని వర్గాల నుంచి తీవ్ర వ్యతిరేకత వస్తుంటే.. మరికొంత మంది మద్దతు ప్రకటిస్తున్నారు. ఈ క్రమంలో చిత్ర దర్శకుడు, ఇతర సిబ్బందికి గుర్తు తెలియని నంబర్ నుంచి బెదిరింపు సందేశం వచ్చింది. ‘ఒంటరిగా బయటకు వెళ్లొద్దు.. మీరు మంచి పనులు  చేయలేదు’ అని సందేశంలో ఆగంతకుడు బెదిరించాడు. దీనిపై సుదీప్తో సేన్‌ ముంబయి పోలీసులకు ఫిర్యాదు చేశారు. ఈ బెదిరింపులపై రాతపూర్వకంగా ఫిర్యాదు అందకపోవడంతో ప్రస్తుతానికి ఎఫ్‌ఐఆర్‌ నమోదుకాలేదు. అయితే ఆ సినిమా సిబ్బందికి మాత్రం పోలీసులు భద్రత కల్పించారు. 

పన్ను మినహాయించిన ఉత్తర్‌ప్రదేశ్‌..

ఈ సినిమాను కొన్ని రాష్ట్రాలు తీవ్రంగా వ్యతిరేకిస్తున్నాయి. ప్రదర్శనను నిషేధిస్తున్నాయి. ఈ సమయంలో ఉత్తర్‌ ప్రదేశ్‌(Uttar Pradesh)మాత్రం ఈ సినిమాకు పన్ను మినహాయింపు ప్రకటించింది. ఈ మేరకు మంగళవారం ముఖ్యమంత్రి యోగి ఆదిత్యనాథ్‌(Yogi Adityanath)ట్విటర్ వేదికగా వెల్లడించారు. ఇదివరకు మధ్యప్రదేశ్‌ కూడా ఈ మినహాయింపునిచ్చింది. 

ఈ చిత్రాన్ని పశ్చిమ్‌ బెంగాల్‌(West Bengal)లో నిషేధం విధించిన నేపథ్యంలో యూపీ(Uttar Pradesh) ప్రభుత్వం నుంచి ఈ నిర్ణయం వెలువడటం గమనార్హం. రాష్ట్రంలో విద్వేషం, హింసాత్మక ఘటనలు చోటుచేసుకోకూడదన్న ఉద్దేశంతో బెంగాల్‌ ముఖ్యమంత్రి మమతా బెనర్జీ ఈ నిర్ణయం తీసుకున్నారని అధికారులు తెలిపారు. ఈ చిత్రాన్ని ఎక్కడైనా ప్రదర్శిస్తున్నట్లు తేలితే కఠిన చర్యలుంటాయని చెప్పారు.