అత్యంత దగ్గరగా వచ్చిన రెండు విమానాలు.. ఎయిర్‌పోర్టులో ఆందోళనకర ఘటన

ఇంటర్నెట్‌ డెస్క్‌: కోల్‌కతా విమానాశ్రయంలో తృటిలో భారీ ప్రమాదం తప్పింది. ట్యాక్సీయింగ్ ప్రాంతంలో రెండు విమానాలు ప్రమాదకర స్థాయిలో దగ్గరకు వచ్చాయి. ఎయిరిండియా(Air India), ఇండిగో(IndiGo) విమానాల మధ్య ఈ ఘటన జరిగింది.

ఇండిగో(IndiGo flight) విమానం కోల్‌కతా విమానాశ్రయంలోని ట్యాక్సీయింగ్ ఏరియాలో ఉన్న ఎయిరిండియా ఎక్స్‌ప్రెస్‌ (Air India Express flight)ను ఢీ కొట్టింది. దాంతో రెండింటి రెక్కలు దెబ్బతిన్నాయి. రన్‌వే మీదకు వచ్చేందుకు క్లియరెన్స్ కోసం ఆ విమాన (Air India) సిబ్బంది ఎదురుచూస్తున్న సమయంలో ఈ ఘటన జరిగింది. టేకాఫ్‌ ముందు లేక ల్యాండింగ్ తర్వాత విమానాలు నెమ్మదిగా కదిలే ప్రాంతాన్ని ట్యాక్సీయింగ్ ఏరియా అంటారు. ఈ ఘటనపై డైరెక్టరేట్‌ జనరల్‌ ఆఫ్ సివిల్ ఏవియేషన్ (DGCA) విచారణకు ఆదేశించింది. అలాగే రెండింటిలోనూ అధికారులు తనిఖీలు నిర్వహించారు.

ఈ సంఘటనతో ప్రయాణికులకు ప్రత్యామ్నాయ ఏర్పాట్లు చేశామని, వారి అసౌకర్యానికి చింతిస్తున్నామని రెండు సంస్థలు ప్రకటనలు విడుదల చేశాయి. ఈ ఘటన సమయంలో ఇండిగోలో 135 మంది ప్రయాణికులు ఉన్నారు. బుధవారం ఉదయం ఈ ఘటన జరిగినట్లు ఎయిర్‌పోర్టు అధికారులు తెలిపారు.