Viral video: కదులుతున్న ట్రక్కు నుంచి దారి దోపిడీ.. ఇవేం ఫీట్లు బాబోయ్‌..!

Viral video | ఇంటర్నెట్‌ డెస్క్‌: ఆగిన రైలు కిటికీలోంచి చైన్లు లాగడం.. పార్క్‌ చేసిన కార్లలో అద్దాలు పగలుగొట్టి డబ్బు దోచుకెళ్లడం వంటివి నిత్యం చూస్తునే ఉంటాం. కానీ కదులుతున్న ట్రక్కు నుంచి సామాన్లు తస్కరించి.. ఆపై సినీ ఫిక్కీలో ముగ్గురు వ్యక్తులు బైక్‌పై పరారయ్యారు. దీనికి సంబంధించిన వీడియో (Viral video) నెట్టింట తెగ వైరలవుతోంది.

మధ్యప్రదేశ్‌లోని షాజాపూర్‌లో ఈ ఘటన జరిగినట్లు తెలుస్తోంది. ఆగ్రా- ముంబయి జాతీయ రహదారిపై వెళుతున్న ఓ ట్రక్కు పై నుంచి ఇద్దరు వ్యక్తులు ఓ మూటను తొలుత రహదారిపై జారవేయడం వీడియోలో కనిపించింది. ఆపై ఆ వెనుకే ద్విచక్ర వాహనంపై ఓ వ్యక్తి రాగా.. వారిద్దరూ కదులుతున్న వాహనం నుంచే ప్రమాదకరంగా బైక్‌పై దిగడం గగుర్పాటుకు గురిచేస్తోంది. అటుగా వెళుతున్న వ్యక్తి దీన్ని వీడియో తీసి సోషల్‌మీడియాలో పెట్టడంతో వైరల్‌గా మారింది. ఈ వీడియోను చూసిన నెటిజన్లు.. ‘ధూమ్‌’ మూవీలో చూపించిన దోపిడీ సీన్లూ దిగదుడుపే అంటూ కామెంట్లు పెడుతున్నారు.