Viral News: పెళ్లిమండపంలో సోదరి.. ఆశ్చర్యపోయిన కుటుంబసభ్యులు..

ఇంటర్నెట్‌ డెస్క్‌: ఇటీవల యూకేలో స్థిరపడిన ఓ యువతి భారత్‌లో సోదరుడి వివాహానికి హాజరై తన కుటుంబాన్ని ఆశ్చర్యానికి గురిచేసింది. సోదరి తన వివాహానికి హాజరుకాలేదని నిరాశ చెందిన సోదరుడు ఆమెను పెళ్లి మండపంలో చూసి ఆనందంలో మునిగిపోయాడు. ఆ వీడియోను ఆమె ఇన్‌స్టాగ్రాంలో పోస్టు చేసింది. కుటుంబ సభ్యుల భావోద్వేగాలతో నిండిన ఈ వీడియో ప్రస్తుతం సామాజిక మాధ్యమాల్లో వైరల్‌గా మారింది.

గతేడాది డిసెంబరులో పోస్ట్‌ చేసిన ఈ వీడియో మూడు లక్షల వీక్షణలు, 42,000 లైకులను సొంతం చేసుకుంది. అయితే ఈ వీడియో చూసిన వీక్షకుల నుంచి మిశ్రమ స్పందన వస్తోంది. వీడియోను చూసిన కొందరు నెటిజన్లు భావోద్వేగానికి గురవుతున్నారు. పెళ్లికూతురు నుంచి బంధువుల దృష్టిని సోదరి తన వైపునకు మరల్చున్నారని మరికొందరు కామెంట్లు పెడుతున్నారు. ‘పెళ్లి కూతురిని చూస్తే నాకు బాధగా ఉంది. అందరి దృష్టి, ఆప్యాయత ఆమెపై ఉండాలి. సోదరుడిపై ఆ యువతికి ఉన్న ప్రేమను నేను అర్థం చేసుకోగలను. కానీ సందర్భానుసారం నడుచుకోవాలి’ అని వీడియో చూసిన ఓ యూజర్‌ కామెంట్‌ చేశారు. ‘ఈ వీడియోలో కనిపించిన కుటుంబ సభ్యుల అనుబంధం నన్ను కంటతడి పెట్టించింది’ అని మరో యూజర్‌ కామెంట్ చేశారు.