Tamannaah: రాజమౌళి ఆ ప్రశ్నకు ఎప్పుడూ సమాధానం చెప్పలేదు: తమన్నా

ఇంటర్నెట్‌ డెస్క్‌: రాజమౌళి దర్శకత్వంలో తెరకెక్కిన ‘బాహుబలి’ ఎంతటి విజయాన్ని సాధించిందో తెలిసిందే. తెలుగు సినిమా స్థాయిని అమాంతం పెంచేసిన ఈ చిత్రంలో ‘అవంతిక’గా తమన్నా (Tamannaah) ఆకట్టుకున్నారు. తాజాగా ఓ కార్యక్రమంలో పాల్గొన్న ఆమె ఈ చిత్రంపై ఆసక్తికర వ్యాఖ్యలు చేశారు.

‘‘బాహుబలి’ నటీనటులకే కాదు.. దేశ సినిమా చరిత్రకే కీలకమలుపు. ఈ చిత్రం తర్వాత ప్రపంచమంతా భారతీయ సినీ పరిశ్రమ గురించి మాట్లాడుకుంది. ఇంత గొప్ప చిత్రంలో రాజమౌళి నాకు అవంతిక పాత్రను ఇచ్చారు. దీంతో నటిగా నిరూపించుకోవడానికి నాకు అవకాశం లభించింది. నన్నే ఎంపిక చేయడానికి కారణమేమిటని దర్శకుడిని ఎన్నోసార్లు అడిగాను. ఆయన ఎప్పుడూ సమాధానమివ్వలేదు. ఆ ప్రశ్న అడిగిన ప్రతిసారీ నవ్వుతూ వెళ్లేవారు. నా టాలెంట్‌ను రాజమౌళి అర్థం చేసుకొన్నారని.. ఆ పాత్రలో నటించడం మొదలుపెట్టాకే తెలిసింది’’ అని తమన్నా చెప్పారు. ప్రస్తుతం దక్షిణాది సినీ పరిశ్రమ గురించి అంతర్జాతీయ స్థాయిలో గొప్పగా మాట్లాడుకుంటున్నారని ఆమె ప్రశంసించారు. 

ఈ వారం థియేటర్‌ / ఓటీటీ చిత్రాలివే!

ఇండస్ట్రీకి రావాలని నిర్ణయించుకున్నప్పుడు కొందరు తన పేరులో మార్పు చేసుకుంటే బాగుంటుందని సూచించారని.. అందుకే అదనంగా రెండు ఇంగ్లిషు అక్షరాలను చేర్చుకున్నట్లు తమన్నా చెప్పారు. ఇక గతేడాది వరుస వెబ్ సిరీస్‌లు, సినిమాలతో విజయాలను సొంతం చేసుకున్న ఆమె ప్రస్తుతం బాలీవుడ్‌ చిత్రాలతో బిజీగా ఉన్నారు. రాజ్‌కుమార్‌ రావ్‌, శ్రద్ధా కపూర్‌ జంటగా నటిస్తున్న ‘స్త్రీ 2’ చిత్రం కోసం ప్రత్యేక గీతంలో నటించారు.