Nag Ashwin: సాహసోపేతమైన ప్రయోగమిది: నాగ్‌ అశ్విన్‌

‘కల్కి 2898 ఎ.డి’ చిత్రంతో సినీప్రియుల్ని అలరించనున్నారు ప్రభాస్‌. ఆయన కథానాయకుడిగా నటించిన ఈ చిత్రాన్ని నాగ్‌ అశ్విన్‌ తెరకెక్కించారు. వైజయంతీ మూవీస్‌ సంస్థ నిర్మించింది. దీపికా పదుకొణె కథానాయిక. అమితాబ్‌ బచ్చన్, కమల్‌హాసన్, దిశా పటానీ ముఖ్య పాత్రలు పోషించారు. ఈ సినిమా జూన్‌ 27న థియేటర్లలోకి రానుంది. ఈ నేపథ్యంలోనే ప్రచార పర్వాన్ని వేగవంతం చేసింది చిత్ర బృందం. ఇందులో భాగంగా ఇటీవల బుజ్జి కారును పరిచయం చేశారు. ఇప్పుడు బుజ్జితో కలిసి భైరవగా ప్రభాస్‌ చేసే సాహసాల్ని ‘బుజ్జి అండ్‌ భైరవ’ పేరుతో ఓ యానిమేటెడ్‌ సిరీస్‌ రూపంలో అందుబాటులోకి తీసుకొస్తున్నారు. ఆ సిరీస్‌ ఈ రోజు నుంచి ఓటీటీ వేదిక అమెజాన్‌ ప్రైమ్‌లో సందడి చేయనుంది. ఈ నేపథ్యంలోనే గురువారం హైదరాబాద్‌లో దీని ట్రైలర్‌ను విడుదల చేశారు. ఈ సందర్భంగా దర్శకుడు నాగ్‌ అశ్విన్‌ మాట్లాడుతూ.. ‘‘ఈ చిత్రంలో బుజ్జి, భైరవల వినోదం అందర్నీ బాగా అలరిస్తుంది. సినిమా విడుదలకు ముందే ఇలాంటి ఓ సిరీస్‌ను ప్రేక్షకుల ముందుకు తీసుకురావడం మా నిర్మాణ సంస్థ చేసిన సాహసోపేతమైన ప్రయోగం. అసలే మాకిది కొత్త జానర్‌. ఈ చిత్రాన్ని యానిమేషన్‌ సిరీస్‌తో ప్రారంభించడం కొత్త విషయం. రెండేళ్ల క్రితం మాకు ఈ ఆలోచన వచ్చినప్పుడు ఇదెంత కష్టమో మాకు తెలియదు. మేము ఈ సిరీస్‌ కోసం ‘ఛోటా భీమ్‌’ లాంటి యానిమేషన్‌ సిరీస్‌లను రూపొందించిన గ్రీన్‌ గోల్డ్‌ సంస్థతో పని చేశాం. వాళ్ల సహకారానికి కృతజ్ఞతలు. ఈ ‘కల్కి..’ కోసం మేము వైజయంతీ మూవీస్, వైజయంతీ ఆటోమొబైల్స్, వైజయంతీ యానిమేషన్‌ అనే మూడు విభిన్న కంపెనీల్ని నడిపించాము’’ అన్నారు.