Chiranjeevi: సతీమణిపై చిరంజీవి స్పెషల్‌ పోస్ట్‌.. ఫొటో వైరల్‌

ఇంటర్నెట్‌ డెస్క్: తన సతీమణి సురేఖ (Surekha)పై ఉన్న ప్రేమను కవిత రూపంలో వ్యక్తం చేశారు ప్రముఖ హీరో చిరంజీవి (Chiranjeevi). ఆమె పుట్టినరోజుని పురస్కరించుకుని సోషల్‌ మీడియాలో పోస్ట్‌ పెట్టి, శుభాకాంక్షలు తెలిపారు. ‘నా జీవన రేఖ, నా సౌభాగ్య రేఖ, నా భాగస్వామి సురేఖ. హ్యపీ బర్త్‌డే’’ అంటూ స్పెషల్‌గా విష్‌ చేశారు. ఈ మేరకు ఆమెతో కలిసి దిగిన ఫొటోను పంచుకున్నారు. చిరు రాసిన కవితకు సంబంధించిన స్క్రీన్‌షాట్లు, ఆయన షేర్‌ చేసిన పిక్ నెట్టింట వైరల్‌ అవుతున్నాయి. అభిమానులు, నెటిజన్లు సురేఖకు విషెస్‌ చెబుతున్నారు. మరోవైపు, తన అత్తయ్య జన్మదినం సందర్భంగా ‘అత్తమ్మ కిచెన్‌’ పేరిట ఫుడ్‌ బిజినెస్‌ ప్రారంభించినట్లు ఉపాసన ప్రకటించారు.

బిజీ లైఫ్‌కు కాస్త విరామం ఇచ్చిన చిరంజీవి సతీసమేతంగా కొన్ని రోజుల క్రితం అమెరికా వెళ్లారు. విహార యాత్రలతోపాటు పలు వేడుకల్లోనూ వారు పాల్గొంటున్నారు. ఇటీవల.. నిర్మాత కుమార్‌ కోనేరు తనయుడు కిరణ్‌ వివాహానికి హాజరైనట్లు సామాజిక మాధ్యమాల వేదికగా తెలిపారు. అక్కడ దిగిన ఫొటోలను పంచుకున్నారు. వాటిలో ప్రముఖ హీరో వెంకటేశ్‌, నిర్మాతలు అల్లు అరవింద్‌, టీజీ విశ్వప్రసాద్‌ తదితరులు కనిపించారు. పద్మవిభూషణ్‌ పురస్కారం వరించిన సందర్భంగా చిరంజీవికి అమెరికాలో సన్మానం చేసేందుకు టీజీ విశ్వప్రసాద్‌ సన్నాహాలు చేస్తున్నారు.

సినిమాల విషయానికొస్తే.. ఇండియాకు తిరిగొచ్చిన అనంతరం చిరంజీవి ‘విశ్వంభర’ (Viswambhara) చిత్రీకరణలో పాల్గొంటారు. దర్శకుడు వశిష్ఠ తెరకెక్కిస్తున్న చిత్రమిది. త్రిష హీరోయిన్‌. వచ్చే ఏడాది సంక్రాంతి కానుకగా జనవరి 10న విడుదల చేయనున్నారు. సోషియో ఫాంటసీ నేపథ్యంలో భారీ బడ్జెట్‌తో ఈ సినిమా రూపొందుతోంది.