David Warner: హైదరాబాద్‌కు డేవిడ్‌ వార్నర్‌

హైదరాబాద్‌: ఆస్ట్రేలియా స్టార్‌ క్రికెటర్‌ డేవిడ్‌ వార్నర్‌ (David Warner) హైదరాబాద్‌కు చేరుకున్నారు. ‘రాబిన్‌హుడ్‌’ (Robinhood) సినిమా ప్రమోషన్స్‌లో భాగంగా నగరానికి విచ్చేసిన ఆయనకు చిత్రబృందం స్వాగతం పలికింది. ఎయిర్‌పోర్ట్‌లో ఆయన్ని చూసేందుకు, ఫొటోలు తీసుకునేందుకు అభిమానులు ఆసక్తి చూపించారు. సాయంత్రం జరగనున్న ‘రాబిన్‌హుడ్‌’ ప్రీ రిలీజ్‌ ఈవెంట్‌లో వార్నర్‌ పాల్గొననున్నారు. చిత్రంలో యాక్ట్‌ చేయడంపై మాట్లాడనున్నారు. సినిమా విశేషాలను పంచుకోనున్నారు.

• ఓటీటీ అవార్డ్స్‌: ఉత్తమ నటుడు మనోజ్‌ బాజ్‌పాయ్‌.. ఉత్తమ సిరీస్‌ ‘పంచాయత్‌3’

మైదానంలోనే కాదు సోషల్‌మీడియాలోనూ డేవిడ్‌ వార్నర్‌కు విపరీతమైన ఫ్యాన్‌ ఫాలోయింగ్‌ ఉన్న విషయం తెలిసిందే. తెలుగు సినిమా డైలాగ్స్‌, పాటలకు సరదా వీడియోలు చేసి నెట్టింట షేర్‌ చేస్తుంటారాయన. ఆ క్రేజ్‌ను దృష్టిలో ఉంచుకుని ‘రాబిన్‌హుడ్‌’ టీమ్‌ తమ సినిమాలోకి తీసుకుంది. యాక్షన్‌ కామెడీ ఎంటర్‌టైనర్‌గా రూపొందుతోన్న ఈ సినిమాలో డేవిడ్‌ అనే పాత్రలో వార్నర్‌ కనిపించనున్నారు. తమ సినిమాలో ఆయన్ను భాగం చేయడం గురించి ఇటీవల హీరో నితిన్‌ మాట్లాడారు.

‘‘మా సినిమాలో డేవిడ్‌ పాత్ర ఎంతో ప్రత్యేకం. సినిమా ఆరంభం నుంచి ఆ పేరు వినిపిస్తూనే ఉంటుంది. ఆ రోల్‌ కోసం ఎవరిని ఎంచుకోవాలో ఆలోచించినప్పుడు.. మా దర్శకుడు వెంకీ కుడుములకు వార్నర్‌నే తీసుకుంటే బాగుంటుందనిపించింది. వెంటనే ఆయన్ను సంప్రదించారు. రోల్‌ గురించి చెప్పిన వెంటనే సినిమాలో యాక్ట్‌ చేసేందుకు అంగీకరించారు. ప్రేక్షకులు తప్పకుండా ఎంజాయ్‌ చేస్తారు. సెకండాఫ్‌లో ఆయన పాత్ర కనిపిస్తుంది’’ అని తెలిపారు. ‘భీష్మ’ తర్వాత వెంకీ కుడుముల, నితిన్‌ కాంబినేషన్‌లో వస్తోన్న చిత్రమిది. శ్రీలీల కథానాయిక. మార్చి 28న ఈ సినిమా ప్రేక్షకుల ముందుకు రానుంది.