Devara: Part 1: కోపం రగిలితే.. మృత్యువుకైనా ముచ్చెమటే!

‘‘దూకే ధైర్యమ జాగ్రత్తా.. రాకే.. ఎగబడి రాకే.. దేవర ముంగిట నువ్వెంతే’’ అంటూ తన వీరత్వాన్ని పరిచయం చేస్తున్నారు ఎన్టీఆర్‌. ఆయన టైటిల్‌ పాత్రలో నటిస్తున్న ఈ పాన్‌ ఇండియా సినిమాని కొరటాల శివ తెరకెక్కిస్తున్నారు. ఎన్టీఆర్‌ ఆర్ట్స్, యువ సుధ ఆర్ట్స్‌ సంస్థలు సంయుక్తంగా నిర్మిస్తున్నాయి. జాన్వీ కపూర్‌ కథానాయిక. సైఫ్‌ అలీ ఖాన్‌ ప్రతినాయకుడిగా నటిస్తున్నారు. ఈ సినిమా రెండు భాగాలుగా విడుదల కానుండగా.. తొలి భాగం ‘దేవర: పార్ట్‌ 1’ పేరుతో అక్టోబరు 10న థియేటర్లలోకి రానుంది. సోమవారం ఎన్టీఆర్‌ పుట్టినరోజు. ఈ సందర్భంగా ఆదివారం ఈ చిత్రం నుంచి తొలి గీతాన్ని విడుదల చేశారు. ‘‘అగ్గంటుకుంది సంద్రం దేవా.. భగ్గున మండే ఆకశం దేవా..’’ అంటూ సినిమాలో దేవరగా ఎన్టీఆర్‌ వీరత్వాన్ని.. తన పాత్ర స్వభావాన్ని ఈ పాటలో వినిపించారు. ‘‘దేవర మౌనమే సవరణ లేని హెచ్చరిక.. రగిలిన కోపమే మృత్యువుకైన ముచ్చెమట’’ అంటూ ఈ గీతంలో తారక్‌ పాత్రను రామజోగయ్య శాస్త్రి వర్ణించిన తీరు ఆకర్షణగా నిలిచింది. ఈ పాటకు అనిరుధ్‌ స్వరాలు అందించడమే కాక తెలుగు, తమిళ భాషల్లో స్వయంగా ఆలపించారు. ఇక ఈ లిరికల్‌ వీడియోలో తారక్‌ను యాక్షన్‌ కోణంలో చూపించిన తీరు.. నడి సంద్రంలో ఆయన చేసిన సాహసాలు సినిమాపై అంచనాలు పెంచేలా ఉన్నాయి. ఈ సినిమా ప్రస్తుతం ముగింపు దశ చిత్రీకరణలో ఉంది. కూర్పు: శ్రీకర్‌ ప్రసాద్, ఛాయాగ్రహణం: ఆర్‌.రత్నవేలు, సమర్పణ: కల్యాణ్‌ రామ్‌.