Vamshi Paidipally: బాలీవుడ్‌ హీరోతో సినిమా.. దర్శకుడు వంశీ పైడిపల్లి ఏమన్నారంటే?

ఇంటర్నెట్‌ డెస్క్: తన తదుపరి సినిమాని బాలీవుడ్‌ హీరోతో తెరకెక్కించనున్నట్లు వస్తున్న వార్తలపై టాలీవుడ్‌ దర్శకుడు వంశీ పైడిపల్లి (Vamshi Paidipally) స్పందించారు. ఓ జాతీయ మీడియాతో మాట్లాడుతూ అవి రూమర్స్    అని కొట్టిపారేశారు. ‘మరి, మీ నెక్స్ట్‌ ప్రాజెక్టు ఏ నేపథ్యంలో ఉంటుంది? ఏ భాషలో తెరకెక్కనుంది?’ అని అడగ్గా.. ఆ వివరాలు పంచుకునేందుకు ఇంకా టైమ్‌ ఉందని, ప్రస్తుతానికి ఏదీ రివీల్‌ చేయలేనన్నారు. సరైన సమయంలో అధికారికంగా ప్రకటిస్తామని తెలిపారు.

షాహిద్‌ కపూర్‌ (Shahid Kapoor) హీరోగా వంశీ పాన్‌ఇండియా స్థాయిలో ఓ సినిమాని రూపొందించనున్నారని, ప్రముఖ టాలీవుడ్‌ నిర్మాత దాన్ని నిర్మించనున్నారని బుధవారం ప్రచారం జరిగింది. వంశీ బాలీవుడ్‌ ఎంట్రీకి ప్రయత్నిస్తున్నారని సోషల్‌మీడియా ఎక్స్‌ (ఇంతకుముందు ట్విటర్‌)లోనూ పోస్ట్‌లు కనిపించాయి. ‘మున్నా’తో డైరెక్టర్‌గా ప్రయాణం మొదలుపెట్టిన వంశీ ఆ తర్వాత ‘బృందావనం’, ‘ఎవడు’, ‘ఊపిరి’, ‘మహర్షి’లతో ప్రేక్షకులను మెప్పించారు.  కోలీవుడ్‌ ప్రముఖ నటుడు విజయ్‌ హీరోగా ఆయన తెరకెక్కించిన ‘వారిసు’(వారసుడు) గతేడాది సంక్రాంతికి విడుదలై సందడి చేసింది.