పోలీసు హెచ్చరిక

ఏ రోజు నేను వాడిని కలుస్తానో... అదే ఆఖరి రోజు అవుతుందని హెచ్చరించింది ఓ పోలీసు అధికారిణి. ఇంతకీ ఆమె హెచ్చరిక ఎవరిని ఉద్దేశించో తెలియాలంటే ‘రక్షణ’ చూడాల్సిందే. పాయల్‌ రాజ్‌పూత్‌ ప్రధాన పాత్రధారిగా తెరకెక్కుతున్న చిత్రమిది. రోషన్, మానస్‌ కీలక పాత్రలు పోషించారు. ప్రణదీప్‌ ఠాకూర్‌ స్వీయ నిర్మాణంలో తెరకెక్కిస్తున్నారు. ఈ సినిమా టీజర్‌ని మంగళవారం విడుదల చేశారు. నేర పరిశోధన నేపథ్యంలో సాగే కథలో పాయల్‌ రాజ్‌పూత్‌ ఓ శక్తిమంతమైన పోలీసు అధికారి పాత్రలో కనిపిస్తారు. ‘వాడెవడో తెలియదు.. కానీ ఎలాంటివాడో తెలుసు...’ అంటూ మొదలవుతోంది టీజర్‌. దర్శకనిర్మాత మాట్లాడుతూ ‘‘ఒక పోలీసు అధికారి జీవితంలో జరిగిన సంఘటనల స్ఫూర్తితో ఈ సినిమా రూపొందింది. నేర నేపథ్యం, మిస్టరీ అంశాలు, పాయల్‌ పాత్ర ఆకట్టుకుంటాయి. ప్రస్తుతం నిర్మాణానంతర కార్యక్రమాలు జరుగుతున్నాయి. త్వరలోనే చిత్రాన్ని విడుదల చేస్తామ’’ని తెలిపారు దర్శకనిర్మాత.