ఆ వార్తలు నిరాధారం

‘హనుమాన్‌’తో జాతీయ స్థాయిలో గుర్తింపు తెచ్చుకున్నారు దర్శకుడు ప్రశాంత్‌ వర్మ. ఇప్పుడాయన బాలీవుడ్‌ స్టార్‌ రణ్‌వీర్‌ సింగ్‌తో ఓ సినిమా చేయనున్న సంగతి తెలిసిందే. దీన్ని మైత్రీ మూవీ మేకర్స్‌ సంస్థ నిర్మిస్తోంది. ఈ ప్రాజెక్ట్‌ రద్దయినట్లు ఇటీవల సామాజిక మాధ్యమాల్లో వార్తలొచ్చిన నేపథ్యంలో తాజాగా చిత్ర బృందం స్పందించింది. సృజనాత్మక విభేదాల వల్ల ఈ చిత్రం ఆగినట్లు వస్తున్న వార్తలు పూర్తిగా నిరాధారమని.. ఇప్పటికే ఈ చిత్ర స్క్రిప్ట్‌ వర్క్‌తో పాటు ఇటీవలే ఫొటో, ప్రోమో షూట్‌ పూర్తయిందని వెల్లడించింది. ఈ ప్రోమో జూన్‌ ఆఖరి వారంలో విడుదల కానున్నట్లు సమాచారం. టైటిల్‌తో పాటు మరిన్ని వివరాలపై అప్పుడే స్పష్టత రానుంది.