పోరు బాటలో నాని

‘సరిపోదా శనివారం’తో ప్రేక్షకుల్ని పలకరించనున్నారు నాని. ఆయన కథానాయకుడిగా నటిస్తున్న ఈ సినిమాని వివేక్‌ ఆత్రేయ తెరకెక్కిస్తున్నారు. డీవీవీ దానయ్య, కల్యాణ్‌ దాసరి సంయుక్తంగా నిర్మిస్తున్నారు. ప్రియాంక అరుల్‌ మోహన్‌ కథానాయిక. ఎస్‌.జె.సూర్య, సాయికుమార్‌ కీలక పాత్రలు పోషిస్తున్నారు. ముగింపు దశ చిత్రీకరణలో ఉన్న ఈ సినిమా  తాజాగా హైదరాబాద్‌లో కొత్త షెడ్యూల్‌ను ప్రారంభించుకుంది. ప్రత్యేకంగా సిద్ధం చేసిన ఓ భారీ సెట్‌లో నానిపై ఓ యాక్షన్‌ సీక్వెన్స్‌ను చిత్రీకరిస్తున్నట్లు సమాచారం. దీనికి రామ్‌-లక్ష్మణ్‌ నేతృత్వం వహిస్తున్నట్లు తెలిసింది. దాదాపు పదిరోజులకు పైగా ఈ షెడ్యూల్‌ సాగనున్నట్లు తెలుస్తోంది. మాస్‌ యాక్షన్‌ ఎంటర్‌టైనర్‌గా ముస్తాబవుతోన్న ఈ చిత్రం తెలుగు, హిందీ, తమిళ, కన్నడ, మలయాళ భాషల్లో ఆగస్టు 29న విడుదల కానుంది. దీనికి సంగీతం: జేక్స్‌ బిజోయ్, ఛాయాగ్రహణం: జి.మురళి.