డబుల్‌ కష్టాలు.. ట్రిపుల్‌ నవ్వులు

ఒకరేమో ఎంచుకున్న పాత్రలతోనే గుర్తుండిపోయే నాయిక.. మరొకరేమో నటనతో పాటు ప్రత్యేక పాటలలో స్టెప్పులు వేస్తూ కుర్రకారుని అలరించే భామ.. మరి ఇలాంటి ఇద్దరు అందాల తారలు కలిసి తెరపై సందడి చేస్తే ఆ హంగామా ఎలా ఉంటుందో చూపించడానికి సిద్ధమయ్యారు కథానాయికలు మృణాల్‌ ఠాకూర్, పూజా హెగ్డే. వీరిద్దరు, బాలీవుడ్‌ హీరో వరుణ్‌ ధావన్‌ ప్రధాన పాత్రల్లో నటిస్తున్న చిత్రం ‘హై జవానీ తో ఇష్క్‌ హోనా హై’. డేవిడ్‌ ధావన్‌ దర్శకత్వం వహిస్తున్నారు. తాజాగా ఈ సినిమా రాకకు ఇంకాస్త ఆలస్యం కానున్నట్లు తెలుపుతూ కొత్త విడుదల తేదీని ఇన్‌స్టా వేదికగా ప్రకటించింది చిత్రబృందం. ‘‘డబుల్‌ ట్రబుల్‌.. ట్రిపుల్‌ ఫన్‌ కోసం వచ్చే ఏడాది జూన్‌ 5న సిద్ధంగా ఉండండి’’ అనే వ్యాఖ్యను జోడించింది. ముక్కోణపు ప్రేమకథగా తీర్చిదిద్దుతున్న ఈ చిత్రంలో జిమ్మీ షెర్గిల్, మౌనీ రాయ్‌ తదితరులు కీలక పాత్రలు పోషిస్తున్నారు.