దర్శకుడు లోకేశ్‌ హీరోగా ‘డీసీ’

‘ఖైదీ’, ‘విక్రమ్‌’, ‘కూలీ’ లాంటి సినిమాలతో దర్శకుడిగా మంచి క్రేజ్‌ను సంపాదించుకున్నారు లోకేశ్‌ కనగరాజ్‌. కొన్ని రోజులుగా ఆయన హీరోగా తెరపైకి రాబోతున్నట్లు వార్తలు వస్తోన్న సంగతి తెలిసిందే. ఇప్పుడు వాటన్నింటినీ నిజం చేస్తూ.. ఆయన కథానాయకుడిగా నటిస్తున్న ‘డీసీ’ చిత్రాన్ని ప్రకటించారు లోకేశ్‌. వామికా గబ్బీ కథానాయిక. అరుణ్‌ మాథేశ్వరన్‌ దర్శకత్వం వహిస్తున్నారు. సన్‌పిక్చర్స్‌ సంస్థ నిర్మిస్తోంది. శనివారం ఈ సినిమాకు సంబంధించిన వివరాల్ని వెల్లడిస్తూ.. సామాజిక మాధ్యమాల వేదికగా ఓ వీడియోను విడుదల చేసింది నిర్మాణ సంస్థ. ఇందులో దేవదాస్‌గా లోకేశ్, చంద్ర పాత్రలో వామిక కనిపించనున్నారు. ‘‘డీసీ రెడీ..’’ అంటూ అదిరిపోయే నేపథ్యం గీతంతో సాగుతున్న ఈ వీడియోలో ఒంటి నిండా రక్తంతో సరికొత్త అవతారంలో కనిపిస్తూ సినీప్రియుల దృష్టిని ఆకర్షిస్తున్నారు లోకేశ్‌. వచ్చే ఏడాది వేసవికి విడుదల కానున్నట్లు సినీ వర్గాలు తెలిపాయి. అనిరుధ్‌ సంగీతమందిస్తున్నారు.